السلام عليكم ورحمة الله وبركاته
مُقله بالتدوين هالفتره بس كيفني وانا ملتزمه كل شهر بتدوينه !! 😂
حابه كثير هالنوع من التدوين لان اتكلم فيه عن اشياء مختلفه , ويساعدني اني اجرب منتجات اكثر
تدوينة هالشهر حابتها كثير لان فيها اشياء مقربه لقلبي جدا ,, تابعو معي ~
ببدأها بقلام بوكس هالشهر 🎁
شرحت عن فكرة صندوق قلام بوكس والاشتراك >> هنا
مكونات صندوق هالشهر :
شامبو من هيد&شولدرز بالتفاح
كونسيلر و برايمر من LAgirl >> جربت منهم الكونسيلر قبل ومرره بطل تكلمت عنه بهالتدوينه >> هنا
قلوس flickable
مناكير من eleanor
بشكل عام حلوه منتجات هالشهر ولطيفه
موقع قلام بوكس : www.glambox.sa
كود الخصم لاول وحده تستخدمه : GBLOVE40
غسول وكريم للنهار من كيو في | QV
وصلوني بصناديق قلام بوكس , الحلو بمنتجات كيو في طبيه وتناسب اغلب البشرات ~
بالنسبه للغسول مو مره حبيته احب احس بالانتعاش بعد الغسولات بس هذا ماحسيت يعطيني هالشعور , مناسب للبشرات الجافه و الحساسه وحلو لاستخدام كل يوم
*
*
كريم للنهار فيه حمايه من الشمس 30 %
مره جميل حبيته تمتصه البشره بسرعه , مايضايق او يدبق او يعطيك طبقه بيضا
جدا ممتاز وناسبني ويناسب اي نوع بشره البنات اللي دوام كل يوم او يتعرضون للشمس راح يكون مناسب لهم
افكر اخذ منه الحجم الكبير
شيت ماسك من ماركة essence
ماسك استخدام واحد , عادي جدا , ما اعطاني بإحساس ولا شي هالنوع من الماسكات حلوه قبل المكياج بعضها تعطي ترطيب ونعومه
مفعولها مؤقت وماهي علاجيه
موجوده بصيدليات النهدي اسعارها 15 ريال
الماسك الاسود ( الفحم )
اخذ شهره فضيعه قبل كم شهر , هل يستاهلها او لا ؟
بالنسبه لتجربتي معاه ماهي سيئه , احط طبقه منه ع الوجه او منطقه معينه استناه ينشف كويس بعدها ابدأ اشيله النتيجه = نعومه ف البشره فقط
اللي عندها رؤوس سوداء راح يشيلها لها , برضو االلي شعر وجهها كثير راح يشيل لك بعض منه , اللي بشرتها فيها قشور واضحه راح تلاحظها طلعت مع الماسك
ريحته اقرب للصمغ و اشك صراحه ان الفحم من مكوناته , ع العموم سواء كانت من مكوناته او لا اثنينهم فكرتهم وحده , يستاهل الضجه اللي صارت عليه بصراحه لا مفعوله مؤقت وماهو علاجي غير كذا ممكن تستخدمين منتجات تعطيك نفس مفعوله
موجود ماسك من هملايا بنفس فكرته بس مو بالفحم وسعره مايتجاوز 20 ريال
كثرة استخدام هالمنتج على كامل الوجه ممكن تهري لك بشرتك , اللي تحطه وتحس انها توهقت اذا جات تشيله >> لانه زي الشمع << تبلل وجهها بالمويه وتشيله بشويش , ولاتحطه مره ثانيه هههههه
طلبته من جولي شيك >> هنا
مجموعة الكرز من ذا بودي شوب 🍒
عندي منها العطر وزبدة الجسم , ريحتها ماهي من الروائح المفضله عندي
الزبده ترطيبها مره حلو للجسم , العطر فيه شيمر (لمعه للجسم) ما افضل استخدمه للجسم بس احب استخدمه على ملابس البيت
عطر برسيف اويسز من افون 💟
صار لي يمكن شهرين او ثلاثه ما اتعطر الا فيه , مره جمميييله ريحته
ثباته رائع يمكن اغلب اليوم اشمه فيني , في الشعر يثبت اكثر
مكونات العطر من المفضله عندي , فلفل وردي ، برغموت ، مسك القطن ، زهور 🌸
من الاشياء اللي لازم يكون عندي كل ما خلص , سعره مايزيد عن 90 ريال
موجود عند مندوبات افون
روج من كولور بوب
من مجموعة الارواج المات عندهم , له سنه عندي و اغلب الايايم ما استخدم الا هو
مايشقق الشفايف , ثباته عالي , اللون مره حلو مع مكياج سموكي اسود , و استخدمه لوحده بدون مكياج بس اكثف الماسكرا مره يعطيني احساس الفل ميك اب
اسم الدرجه : بيبر | beeper
سواتش لها
موجوده بموقع كولور بوب وعند بعض التاجرات
عينة ماسكرا وصلتني من قلام بوكس من ماركة jane iredale
الماسكرا تجنن ممرره , ناسبت رموشي اعطتني طول وكثافه , طبعا انا احب احط اكثر من طبقه عشان اوصل للشكل اللي ابيه ف الحلو فيها ماكتلت معي ابدا ولا اعطتني احساس مزعج او انها ثقيله ع الرمش
حبيتها صراحه و بحاول ادور منها على الحجم الكبير
بيبي كريم من اولاي
فيه حمايه من الشمس 15 , خفيف على البشره مره مره مره قوام ولون
يدهن بعد ساعه من استخدامه
ماحبيته ابدا , افضل اني استخدم كريم مرطب و اخلط معه فاونديشن ولا استخدم هالبيبي
موجود بالصيدليات و السوبر ماركت
سليبرالشتاء 💓💓💓💓
طلبته من موقع جولي شيك , كرفته صراحه مره كثير وغسلته كثير ويرجع جديد نفس ما هو
من مفضلاتي الشتويه وحالياً
رابطه بالموقع : هنا
تيشيرت السعاده 💚
اكثر قطعه لبستها وماصار لي سنه من اشتريتها , شخصية وشوشني من فيلم الطفوله المفضل عندي (فلم شركة المرعبين المحدوده)
اغلب شخصيات هالفلم احبها و من شفت هالتيشيرت صارت عيوني قلوب 😍 برغم انه من القسم الرجالي
خامة التيشيرت مو قطنيه , اتوقع بوليستر خفيف , رغم اني اخذت مقاس اكس سمول بس وصلني ميديم مقاسه حلو علي يهفهف ههههه
طلبته من موقع جولي شيك : هنا
عشان احمس نفسي اشرب مويه كثير صرت اعبي هالعلبه اللطيفه و احطها بغرفتي ساعدتني اخلص المويه اللي فيها
الحلو فيها انها زجاج , مقاسها 450 مل
يجي معاها جراب يحفظها من الكسر و تقدرين تفكينه عنها
طلبتها من جولي شيك : هنا
اخر شي كتاب الشهر 📚
للاسف هالشهر مافي كتاب راح اتكلم عنه , مو اني اخليت بالتحدي بالعكس قرأت كتابين بس ماكملتهم لانهم رائعين وحابه اتعمق فيهم
بس هالشهر زي ما انتو شايفين بالصوره باقي اسبوعين على اختبارات الفاينل وبما انه ترم تخرج حبيت اقضي اغلب وقتي بين كتب الجامعه
بكذا انتهت تدوينتي , لاتحرموني دعواتكم و اكيد تعليقاتكم انتظرها تحت
وشكرا ~ 💖
يعطيكي العافيه حبيتهم اشياءك تجنن حمستيني اطلب من موقع جولي شيك😍👌🏻
ردحذف