منتجات شهريه : فرشة المروحه , مناديل الطهاره , تقويم الشهر ... واكثر ~

السلام عليكم ورحمة الله وبركاته

تدوينة شهر مارس , ماراح تكون طويله فيها منتجات اغلبها حبيتها ونهاية التدوينه اكيد كتاب الشهر و بضيف لكم منظم شهري مره فادني كثير مع رابط عشان تطبعون جدول كل شهر

ببدأها بمنتجات الشعر

زيت باراشوت

هو زيت جوز الهند عضوي ينفع للعنايه و الطبخ , لو انتي ماتقدرين تطلبين جوز الهند العضوي اللي بالمواقع , هذا افضل بديل ممتاز يعطي نفس نتائج الجوز هند العضوي ريحته مقبوله جدا ترطيبه للشعر جمممميل لو بتستمرين علييه راح يعالج لك التقصفات و البهتان اللي بالشعر

موجود ببعض الصيدليات والعطارين , هاذي العلبه الصغيره سعرها 15 ريال

*

*

شامبو وبديل الزيت من غارنييه مجموعة الالترا دوكس

المجموعه بالعسل و مخصصه للشعر الجاف و التالف , الشامبو خلصت منه 3 علب عادي حسيته بس حلو مايجفف الشعر

بديل الزيت روووعه جد روعه ناسب شعري كثير , شعري كيرلي وجاف ف اذا استخدمته يرطب شعري و تصير اللفات حق الكيرلي صحيه , احب احساس شعري من بعده , اكيد برجع اشتريه

*

*

بلسم للشعر وصلني بصندوق قلام بوكس الشهر اللي فات هنا تدوينته >> منتجات شهريه : AVON , كريم تفتيح الركب , الصابون المغربي ... كتاب الشهر ~

بالكيراتين والبروتين يعتبر معالج للشعر , ماحبيته انا حسيت بطبقه مزعجه بشعره و احساس غريب

*

*

صنفرة النعناع

حبيباتها كبيره تقشيرها عادي مشكلتي معاها هي المنتج نفسه مايعطيني احساس نظافه كأنه كريم و اضافو له حبيبات و ريحة نعناع

ممكن اجرب انواع ثانيه منها بس هالنوع لا

*

*

غسول الوجه من ايفا

مكتوب عليه غسول ومزيل مكياج للبشره الدهنيه بالزبادي والخيار , خالي من الصابون

ع العموم منتجات ايفا ع انها رخيصه بس ممتازه , هالغسول مره جميل ينظف البشره ولطيف عليها كغسول يومي مايعطيك احساس انها جافه مره , اللي بشرتها تتحسس من الصوابين ممكن هالغسول يناسبها

بشرتي مختلطه وناسبني , برجع اجرب من هالشركه منتجات ثانيه , سعره مو اكثر من 15 ريال

*

*

مناديل الطهاره , للمنطقه الحساسه

ريحتها لطيفه مره , حلوه للسفر او اللي دوامها طويل ممكن تعطيها انتعاش

المناديل ماهي طبيه بس انا ناسبتني وماسببت لي مشاكل , ممكن ارجع اشتريها , سعرها 15 ريال موجوده بالنهدي ووايتس

*

*

مزيل عرق بالزبادي من شركة ماي واي (may way )

من اجمل المزيلات اللي جربتها , لمدة 24 ساعه مستحيل تشمين بنفسك ريحة عرق , غير كذا مافيه كحول او روائح عطريه

انصح فيه صراحه وبرجع اطلبه اكثر من مره ,  للبنات اللي اعمارهم 10 - 15 سنه ممكن يناسبهم خصوصا الحين بدأ الحر

اللي ماحبيته فيه انه عصار زي الكريم ف ماحبيت هالشي , سعره 7 ريال بعد الخصم موجود عند مندوبات شركة ماي واي

*

*

روج من كولور بوب

كريمي ع الشفايف مايجففها , ثباته ساعتين تقريبا , هالدرجه فتره طويله ادمنتها كثير شبهوها بدرجة كشمير صح في شبه بس هاذي احلى وحاليا صرت ادمجها مع الوان ثانيه

درجته : توتسي (TOOTSI) موجود بموقع كولور بوب

*

*

فرشة المروحه (فان برش) من بودي شوب

مؤخرا بودي شوب اطلقو مجموعة فرش , ميزة هالفرش نباتيه صديقة للبيئه , شعرها ناعم مره مع انه صناعي , مقبضها خشب طبيعي , جودتها رائعه صراحه

اللي حبيتها مره مره مره هالفرشه مره جميله للإضاءه ماتاخذ كثير من المنتج

سعرها بحدود الاربعين او الستين ريال

*

*

كتاب الشهر

كتاب نصفها في الماء ، للكاتبه ساره الحداد

الكتاب عباره عن خواطر منوعه ، ما احب هالنوع من الكتب بس كتاباتها جدا رائعه و تمس القلب برغم ان بعض الصفحات عباره عن جمله وحده بس مره عجبني وكل فتره ارجع اقرأه ، كلامه مو معقد و الكلمات فيه بسيطه و غير ممله

هالشهر اخترت هالكتاب لان كان عندي ضغط تدريب تخرج ومحاضرات ف ماحبيت اقطع تحدي الكتب كان هو انسب شي لانه بسيط ❤

تصميم الكتاب بسيط ورايق ، صفحاته جميله ، بشكل عام حبيته و انبهرت اكثر ان الكاتبه اخت صديقه سابقه لي شعور غريب كنت اشوفها طفله وفجأه كتابها عندي ماشاء الله 😢

ما اعرف وين ممكن تلاقون الكتاب بس هذا حسابها بتويتر تقدرون تسألونها >> ساره حداد

*

*

اخر شي اللي مره حابه انكم تستفيدون منه لانه فادني بشكل مو طبيعي هالشهر هو منظم او تقوم او كالندر 

طبعا واضح قد ايش مكروف ومليان مهام بس جد بنات انصح كل وحده منكم تجرب بس لمدة ششهر وبتشوف شلون كتابة المهام بترتب لها وقتها وتخليها منجزه اكثر

من فتره كنت ادور لمنظم شهري يكون تخطيطه حلو سألت ف الانستقرام ومحد جاوبني طبعا رحت البينترست ولقيت فيه اشكال و انواع , هذا اكثر شي ناسبني لان مساحة المربع فيه كبيره ف تكفي للمهام اليوميه , لو جربتو منظمات شهريه ارسلوها لي

رابط المدونه اللي لقيت فيه الكالندر من تصميمها : هنا

الرابط بصيغة PDF موجود فيه كل الشهور : اضغطي هنا

وبكذا انتهت تدوينتي لهالشهر لاتنسون تشوفون التدوينات السابقه ,  اكيد استنى تتركو لي تعليقاتكم تحت

وشكرا ~