منتجات شهريه : قلام بوكس , بودي شوب , كتاب و شنطة الشهر و اكثر ...~

السلام عليكم ورحمة الله وبركاته

سلسلة تدوينات جديده ببدأها بهالسنه بتكلم فيها عن منتجات منوعه وجديده

,

,

,

ف البدايه كتاب الشهر , بهالتدوينه >>هنا <<  ذكرت اني بسوي تحدي 12 كتاب بالسنه والحمدلله ماشيه زين بهالتحدي

اول كتاب انتهيت منه بشهر يناير هو كتاب حكايا سعودي في اوروبا للكاتب عبدالله الجمعه ،،

عارفه مو جديد وفتره من الفترات صار الكل يقرأه بس انا تو قرأته وانتهيت منه في3 ايام

بصراحه حبيته مره ممتع والكلام فيه جميل اسلوب الكاتب بسيط مافيه تعقيد وهذا اللي خلاني استمتع فيه وما انتبه كم صفحه قرأت ،

تعلمت كثير مصطلحات ، سجلت اسماء بعض الاماكن اللي زارها الكاتب على امل اني ازورها بيوم ، عشت اللحظات مع الكاتب حب المغامره خصوصا بموقف السيده كرونهايمو ، المواقف الطريفه ،  و اخرها اشتياقه لوالدته جد جد خنقتني العبره من الموقف 💔

جدا استمتعت بالكتاب ، ماراح اقول انصح فيه او لا بالنهايه الكتب اختيار شخصي بحت بس نصيحتي لكل وحده تصفحي الكتاب قبل تشترينه

،

،

سعر الكتاب 39 ريال ، موجود بجرير 😊

,

,

,

قلام بوكس , الاغلب صار يعرف هالشركه و ايش فكرتها

هي خدمه شهريه يوصلك بوكس كل شهر حسب الباقات اللي انتي مشتركه فيها 3 ,6 شهور او سنه

عباره 4 منتجات منوعه مابين منتجات عنايه او ميك اب او عطور , وصلني هالبوكس منهم وهو اول صندوق في 2017 لشهر يناير ح ب ي ت محتوياته وواضح جدا التطور الملحوظ متفائله بهالسنه انهم يتحسن مستواهم للافضل لان البوكسات السابقه كانت مو مره , يستاهل الاشتراك وخصوصا لو كان في خصم 50 او 30 % يصير سعر الاشتراك مره جميل

محتويات الصندوق :

مقشر ارجل من بيبي فوت

جهاز فيرو لونا لتنظيف البشره استخدام 100 مره فقط

غسول من qv

روج من ريميل

موقع قلام بوكس : www.glambox.sa

,

,

,

مقشر الزيتي البرازيلي من ذا بودي شوب ..

فكرته مقشر للجسم وبنفس الوقت مرطب , ريحته جميييييييييله مره مره مره , حبيباته  ناعمه يعني ممكن تستخدمينه بالاسبوع  ثلاث اربع مرات , علبة المنتج كبيره نوعا ما انا كفتني شهر مع الاستخدام الاسبوعي مابين 2-3 مرات بالاسبوع

تجربتي معاه من اول استخدام طلعت لي حبوب صغيره بيديني استغربت اول مره جسمي يحسس من منتج , انتظرتها تخف و استخدمته مره ثانيه نفس الشي طلعت حبوب بس بشكل اخف , من بعد ثالث استخدام ماطلعت لي الحمد لله , اتوقع المنتج فيه نسبه من العطور ف عشان كذا حسس بجسمي , بس حبيت تقشيره مره لطيف وترطيبه روعه اليوم كله جسمك مترطب , حبيت استخدامه  اكثر وجسمي جاف قبل ما ابلله بمويه لان يعطيني تقشير اقوى شوي

حلو للي مشغولين طول الاسبوع ف تستخدمينه بشكل سريع ثلاث مرات بيقشر لك ويرطب بنفس الوقت , عني انا حبيت فكرة المنتج وريحته مره جميله , طبعا ممكن ارجع اشتريه

سعره : 119 ريال

كريم للجسم بعشب البحر الاطلسي

كمية المنتج كبيره , استخدمه بعد الشاور ريحته تعتبر فواحه كم ساعه , للاسف للاسف ترطيبه لايذكر ابدا

قوام المنتج مائي ف ترطيبه يعتبر ولاشي

ما انصح فيه ولا راح افكر اشتريه

سعره 119 ريال

باليت الايشادو من بودي شوب

مؤخرا اطلقو باليت ايشادو رباعي او الكبير ثماني ، تعليب الباليت وجودته فخمه 👌 والاحلى تقدرين تطلعين الالوان وتعيدين تركيبها تسوين الباليت الخاص فيك بالالوان اللي حابتها 

 انا هذا الباليت حقي سويته بنفسي وخليته دايم بشنطتي اعتمدت الوانه تناسب اطلع فيه بأكثر من لوك + اللون البني للحواجب + الاضاءه استخدمها لباقي الوجه , درجات الالوان من اليمين : 

Peru clay

البني : 

AMAZONIAN EARTH

اللؤلؤي : 

INDIA ROSE QUARTZ

اللون اللي بجنبه مابين البني و الموف : 

BENGAL GRANITE

،

جودة الالوان : 

حبيت اكثر الالوان الغامقه الاسود والبني والكحلي وضوحها من اول مره ، والالوان الشيمر جمميله ، لو بتحطينها فتره طويله او جفنك دهني يفضل تستخدمين معها برايمر بتثبت اكثر ✨

،

،

توزيعها ودمجها سهل وممكن تستخدمين معاها فرشه مبلله بمويه ، افضل احطها بأصابعي لان بعض الفرش تنثر لي الظل و بعض الالوان تتناثر ، لو بنصح بلون معين انصح باللون الكحلي بلا مبالغه من اجمل الالوان 💘 

سواتش لبعض الالوان 

سعر الباليت الرباعي 89 ريال والثماني 119 ريال

،

،

،

اظلال نكس المفرده (بالحبه)

ايشادو نكس ، عندي منها الثلاث اللي بالصوره ،حلو  مره حجمها للشنطه ، حبيت البني واللؤلؤي ، بالنسبه للبني حلو استخدمه للحواجب او تمويه لخط الرموش السفلي او كإستخدام يومي لكسرة العين 👍

درجته ؛ Taupe

اللؤلؤي ✨ ملمسه خشن شوي كأنه قليتر مره حلو لتحت الحاجب او مدمع العين او حتى كظل على كامل الجفن مع ايلاينر 👌 

درجته ؛ Pixie lutin

اللون الاخير حلو لونه زيتي مع لمعه ناعمه 

درجته ؛ After party ،

سواتش للدرجات ,,

اللي حابه تجربها انصحها تاخذها بالتخفيضات سعر الواحد يكون 9 ريال 

من سنتر بوينت * لايف ستايل 

*

*

*

اخر شي بمنتجات الميك اب 

كونسيلر غارنييه

 غيرو تعليبه عن القديم بس نفس المنتج ماتغير للاسف التعليب القدديم احلى وعملي اكثر , انا احبه للمكياج اليومي بشكل خفيف

حلو للي ماعندهم هالات قويه خفيف ع البشره وتغطيته خفيفه , استخدمه بعد تنظيف تحت الحاجب وممكن للاماكن اللي فيها اثار حبوب اذا ماحبيت استخدم فاونديشن

اقلام حواجب : طلبتها من جولي شيك كان عليها تخفيض اتوقع ب 8 او 11 ريال للواحد , فكرتها حلوه جزء قلم والرأس الثاني فرشه للتمشيط , فكرة المنتج حلوه بس الاقلام نفسها ماطولت معي ونشفت صارت ترسم بشكل خفيف

رابطها بالموقع : هنا

برايمر من ميبلين : اذا كنت حابه الفاونديشن يمتد معي ويتوزع بشكل حلو وناعم ويثبت اطول ع طول استخدم البرايمر , شكل المكياج ارتب يصير ويثبت اكثر , استخدمه قبل المكياج ب 5-10 دقايق بعدها اوزع الفاونديشن وهالاشياء

يرطب لي بعض المناطق اللي فيها قشور ونفس بشرتك لو لمستيها بعده يعطي نعومه فضيعه

انصح كل وحده ماتستخدم البرايمرات بشكل مستمر لانها فعلا دمار للبشره , يعني خليه لوقت المناسبات

يستاهل التجربه , سعره : 35 ريال من سنتربوينت و صيدلية النهدي

,

,

اخر شيئين حبيت اتكلم عنهم كوني استلكتهم بشكل مو طبيعي و لا زلت

شوز سبورت بلون مميز (سماوي) وشكله غير عن المعتاد , هو الشوز اللي استخدمته بأغلب طلعاتي المميز فيه شي واحد هو ان القماش نفسه حق الشوز يسمح بالهوا ف ماتطلع منه ريحه سيئه , ويساعد ان القدم ماتتعرق كثير , بس الشي السلبي ممكن يدخل بعض الاتربه للرجل , عني انا ما اشوفها مشكله وماصارت لي الا مره وحده

طلبته من جولي شيك : سعره 100 وعليها حاليا عليه تخفيض للنص , رابطه بالموقع >> هنا << اخذت نفس مقاسي وطلع ممتاز 

*

*

شنطة الشهر , مغرمه فيها لابعد حد

كروس بودي بحجم صغير , ماتوقعت بيوم ممكن احب الشنط الصغيره  و اتعود عليها كون ان اغراضي كثير و اغلبها احتياطات , بس غيرت فكرتي تماماً , كانت عاجبتني وحده نفسها بمانقو بس ولا مره لقيتها بالمحل , المميز  بهالشنطه الخامه حقها ممتازه ماتوقعتها توصلني كذا , غير كذا عمليه جدا كرفتها كثير وماتغير فيها شي , لونها طيني مناسب مع العبايه مايسود او تلقط الوسخ بسرعه , وشكلها مرتب

السير حقها سلسله ومن عند الكتف جلد ف ابدا مايوجع 

محتوياتها من الداخل تكفي هالاغراض و غير قابله للزياده ابدا هههههه

طلبتها من جولي شيك سعرها 68 ريال وبالتخفيض تصير بالاربعينات رابطها بالموقع >> هنا <<   لاتخلصونها علي ناويه اطلب منها الالوان الباقي $:

انتهت تدوينتي لليوم , انتظر تعليقاتكم بفارغ الصبر

شكرا لكم ~