السلام عليكم ورحمة الله وبركاته
سنه سعيده يارب ع الكل 💓
تدوينه جديده من نوعها على مدونتي , وعدتكم بالتدوينه السابقه هنا , اني اشارككم بلانري لهالسنه
اغلب الصفحات انا صممتها بإستثناء كم شغله اخذتها من البنترست , وبشكل عام البنترست كان ملهمي الوحيد في التصاميم وتجميع الافكار وبعض التقاويم
فيه تصاميم كثير مجانيه وبمقاسات مختلفه فقط اكتبو بالبحث
(تاريخ السنه)Planner free
{ تحديث 2020 }
هالسنه تقريبا نفس تخطيط السنه اللي راحت بس ألغيت بعض الصفحات لأني ما احتاجها , تخطيط هالسنه بناء ع اللي احتاجه و من تجربة العام
نهاية التدوينه روابط المخطط & البلانر بكبره للي حابه تطبعه جاهز
حددت الصفحات اللي ابيها وكانت كالتالي :
1- الاهداف وصممتها بشكل عشوائي لاني احب اخطط بشكل عشوائي ف الكتابه واكتب تفاصيل
2- تقويم و صفحه لأهم الاحداث
3- صفحات To do & Note , وتصميمها مره بسييط كل طرف صفحه الاسم وتركتها فااضيه , طبعتها بداية السنه و بعد 6 اشهر حطيتها بعد لاني برتب فيها المهام و مراجعه للنصف الثاني من السنه وتجديد الاهداف او الخطط
4- صفحتين للمدونه
5- تبدأ الاشهر , صفحه فيها تقويم الشهر وبعدها خمس صفحات للاسابيع وهكذا
6- اخر البلانر صفحات فاضيه
هالسنه بعد حبيت اضيف بلانر صغير اصير اخذه معي برا البيت
ف قررت بعد اسويه بنفسي
اشتريت نوت A6 وهو الحجم المطلوب
بحثت ف البنترست عن مخططات له , وبما اني عندي بلانر اساسي وهذا بيكون استخدامي له بسيط قررت اخططه كالتالي :
صفحتين مقابل بعض , باليسار قسمتها ع الاسابيع واليمين تقويم صغير للشهر وتحته نوت للملاحظات
هذا هو تخطيط كل شهر فقط وباقي الصفحات فارغه اذا احتجت اكتب زياده
النوت اخذته من جولي شيك بسعر 16 ريال
رابط المنتج : هنا
واجهت بعض الاخطاء في المقاسات بس اوك مشي الحال بعدين , حتى الورق حسيته لو كان سميك اكثر بيكون عملي لكن قدرت اتخطى هالنقطه
بالبدايه حددت انا ايش ابغا و ايش الصفحات اللي احتاجها و اهم شي كم مقاس البلانر , اخترته A5 مقاس الدفاتر تقريبا
اخترت الالوان والثيم تبع الصفحات حبيتها تكون حياديه ابيض و اسود ومافيها تفاصيل ونقوش كثير لان راح اضيف لها انا ستيكرات ورسومات و بعض الشخابيط
اللغه : بالقصد مني حطيت اللغه حق البلانرانجليزي و نظامه من اليسار لليمين , بس بالنهايه هو جدا بسيط ومو معقد
بالنسبه للطباعه اطبعي كل ورقتين بصفحه , خيار من الطابعه تلاقينه , الورقه A4 بالضبط نصها يجي مقاس A5
بعض الصفحات اللي ظهرهم فاضي لصقتهم ببعض بحيث تكون سميكه اكثر وماتنقطع
الغلاف هو اكثر شي تعبني بالقوه توفر بالموقع وبالقوه وصلني عشان كذا تأخرت اني اسوي البلانر , مقاسه A5 شفاف اسود خامته بلاستك بس مو واقف لين
بعد الغلاف بتواجهك اول صفحه فيها المعلومات الشخصيه
الصفحه التاليه فيها التقويم هجري وميلادي , انا امشي ع الميلادي بس حبيت اضيف الهجري عشان اطابق بعض المواعيد
الصفحه اللي بعدها اهم الاحداث بالسنه وتاريخها بالميلادي , امام كل شهر تاريخ اليوم و الحدث اللي بيصير
الصفحه اللي مقابلتها خليتها فاضيه عشان اضيف بعض الايفنتات و المواعيد حقي
صفحة الاهداف , خليتها خمس نقاط بس وماكتبتها , دائما نصيحتي لكم الاهداف لاتتحمسون وتكتبونها ببداية السنه كل فتره اكتبي هدف و التزمي فيه , الصفحه المقابله اضفت نوتس وكتبت فيه ابرز الاشياء اللي حابه اسويها
حبيت هالسنه تكون عندي قائمه للكتب و الافلام و البرامج , تقريبا بدأت اعبيها
بالصفحه المواجهه قصيت ورقه من دفتر التلوين كفاصل
صفحة المشتريات , مهم اكتب كل شغله اشتريتها سواء جهاز او قطعه استثماريه ذهب او اكسسوار او ساعه , مفيده هاللسته للناس اللي تحب تدخر او تبغا توازن بمشترياتها
هالجدول فيه مربعات بعدد ايام السنه , من فوق الاشهر وتحت كل شهر عمود بعدد الايام
تحتها اضفت مفاتيح *مربعات فاضيه * كل مربع بيكون بلون , مثلا عنايه , تمارين , ديتوكس , اي يوم اسوي فيه شي من هالاشياء الونه ... خليت لكم مربعين فاضيه بحيث لو حابه تضيفين لها شي تلتزمين فيه
الصفحه اللي مقابلتها راح ارسم فيها و اكتب قياساتي 💆
مدونتي , حبيت يكون لها مساحه واسعه وخاصه فيها اكتب اهم التدوينات والافكار اللي بشتغل عليها
لسته ومقابلها صفحة نوت فارغه , حطيتها ببداية السنه و بعد ست شهور نفس الصفحات حطيت , اكتب فيها ابرز الاشياء اللي التزم فيها طوال هالست شهور مثلا عندك تعزيل الدواليب بشكل دوري , كورس معين ادويه او ريجيم حابه تمشين عليه ...وهكذا
بعدها تبدأ الاشهر , صفحه موضح فيها كالندر الشهر ومقابلها اقتباس بسيط
بكل شهر خمس اسابيع , المربعات حق الايام تبدأ من الاحد واسعه وتكفي تكتبين بكل راحه فيها , واخر مستطيل فارغ للنوت او خرابيشك
ماكتبت تواريخها لان خلاص عندي التقويم الشهري و حابه انا اكتب بطرف كل مربع من فوق كل يوم تاريخه و ايش يقابله بالهجري
اخر صفحه بالبلانر حطيتها لحساباتي و ايميلاتي والباسوورد لاني كثير انساها
وبعدها اضفت اوراق منقطه اضافيه لاني احب اخطط فيها
*
*
*
فبراير | february
مارس | March
ابريل | April
مايو | May
يونيو | june
يوليو |July
اغسطس | August
سبتمبر | September
اكتوبر | October
نوفمبر | November
ديسمبر | December
البلانر كامل : هنا
* صفحة الاسابيع الاخيره اطبعيها بعدد الاشهر كل شهر 5 اسابيع *
اهم الاحداث في 2020 مهمه للي عايشين بالمملكه لان الاحداث كلها تخص الدراسه و الاجازات فيها : هنا
الكالندر الشهري اخذته من هالموقع : هنا
جدول العنايه و التمارين صممته انا تقدرين تحملينه : هنا
ليست هناك تعليقات:
إرسال تعليق