العنايه بالشفايف : مرطبات ومقشرات ~ Lip care

السلام عليكم ورحمة الله وبركاته

مشكلة جفاف الشفايف وتقشرها كثير من الأشخاص يعانون منها , وتزيد هالمشكله بتغير الجو

ومع كثرة منتجات العنايه بالشفايف وتنوعها محد اتفق على حل جذري لهالمشكله , ومنتجات تعطي مفعول لشخص والأخر لا

هالتدوينه بتكون خاصه بجميع منتجات الشفايف سواء ترطيب او تقشير او غيرهم


 وبحدثها كل ما جربت منتج جديد

ف البداية شفايفي طبيعيه , ما اعاني من تشققات او جفاف شديد , تجي حالات بتغير الفصول او السفر اعاني من تقشر فيها

ماكنت اهتم بترطيبها بكل دائم ولا استخدم مرطب الشفايف بشكل يومي ,  اذا حصل وجفت على طول مسحة فازلين تفي بالغرض

من سنه بدأت استخدم المرطبات بعنايتي اليوميه , برغم انه ماعندي أي مشكله بس اضفتها والتزمت فيها وعليها هالتدوينه قائمه

ملحوظه : المنتجات الطبيه بصيدلياتنا اسعارها مرتفعه ف افضل تاخذينها من الصيدليات الاجنبيه اون لاين , غالباً تكون نصف او ربع السعر 😄

 }مقشرات الشفايف {

كثير براندات توفرها , ما اهتم لها صراحه ولا افكر اقتني شي محدد منهم لان اسويهم بالبيت بمنتجات طبيعيه

 لكن عندي هالمنتجين

اللي ع اليمين من جوسي مران عباره عن سكر وزيت هو للجسم بس ممكن يستخدم للشفايف , يوضع على الشفايف كم دقيقه بعدها باصبعك تحركينه بشكل دائري ويقشرهم لك

المنتج الثاني مقشر بالنعناع من بودي شوب , حبيت فكرته اكثر وعملي لان قوامه متماسكه

عباره عن ستيك زي الروج فيه حبيبات النعناع , يوضع لدقائق ونفس الحركه باصبعك او بفوطه دافيه تقشرينه

بالبيت تقدرين تسوين مقشر خاص فيك بمكونين فقط : سكر , زيت زيتون او زبدة شيا او فازلين

} مرطبات الشفايف {

مجموعة مرطبات الشفايف من فازلين

فازلين كنا نستخدمه لترطيب أي شي وكان يعطي مفعوله , هالسنه اصدرو مرطبات خاصه بالشفايف بعدة نكهات

قوامها اخف من الفازلين , مريحه ع الشفايف ماتدبق لكن ماتعطيك ترطيب عميق , اللي بالكرز يعطي لون خفيف

مجموعة بودي شوب

عندهم نوعين من مرطبات الشفايف , القديم بالصوره فوق بالمانجو ثقييل ع الشفايف وماتمتصه زين , ماحبيته يترك طبقه صفرا بعد

النوع الثاني هو اللي حبيته , تعليبه عملي ومريح وناسبني

منه عدة نكهات , اكثر شي حبيته الأخضر اللي بالكيوي نكهته لذيذه ومافيه لون وترطيبه متوسط , الباقي ترطيبهم خفيف وفيهم لون احب احطهم لدوام او مشوار سريع

اسعارها بالثلاثين

مجموعة دكتور باو باو Dr. PAWPAW

عندي منهم ثلاث أنواع من مرطبات الشفايف , مكوناتها طبيعيه , الاثنين اللي بلون واحد مشمشي والثاني احمر يعطون لون ويستخدمون للشفايف والخدود , حبيتهم اكثر للخدود يعطون ترطيب  ولون

الحلو فيهم الأصفر بدون نكهه او لون ويتميز انك تقدرين تستخدمينه للشفايف والجسم والشعر بصراحه كان يفك لي ازمه أحيانا لان فعلا استخدمه لمناطق جسمي , قوامه نفس الفازلين

اللي ماحبيته تعليبهم عصار , لو راسه مصمم زي الروج بيكون اسهل ف الاستخدام

متوفر منهم حجمين تلاقونهم ببعض الصيدليات سعر الواحد : 30 ريال

من بايوت Payot

افضل منتج لهالسنه , هو اللي استخدمه بشكل يومي وطول معي مره للحين ماخلص

البراند طبي , المنتج ماله لون ولا نكهه مناسب لكل أنواع الشفايف , يوعد انه يرمم الشفايف الشديدة الجفاف لكن انا ناسبني وماعندي جفاف واحس قوامه مو ثقيله انه يعالج الجفاف الشديد

لكن هو المنتج المفضل عندي صغير وكميته كبير وتعليبه جميل

سعر المنتج : 70 ريال

يورياج

من البراندات الفرنسيه الطبيه ولها تقييم عالي , المرطب مره لطيف ع الشفايف وترطيبه حلو , يشبه بايوت 

سعر المنتج : 57 ريال

مرطب الشفايف بالعسل من نوكس

نوكس بعد تعتبر براند طبي , هالمنتج مشهور جدا عندهم , حبيت مكوناته كلها زيوت طبيعيه  بس ما حبيت تعليبه افضل لو كان ستيك او شكل ثاني بحيث ما اضطر استخدم اصبعي او فرشه

قوامه دهنيه , احسه مناسب اكثر للشفايف المتشققه

سعر المنتج بصيدلياتنا : 90 ريال

ماسكات الشفايف الجاهزه

هل هي علاجيه ؟ لا , واعتبرها منتج مؤقت فقط لقبل المكياج اذا بستخدم روج مات احطها قبله تعطي ترطيب مؤقت

ماتغني عن مرطب الشفايف و اشوف انك تاخذين مرطب اوفر لك من الماسك

*
*
*
لهنا انتهت تدوينتي

سلام ~