الأحد، 30 ديسمبر 2018

شتاء ديسمبر 2018... وداعاً ~


السلام عليكم ورحمة الله وبركاته

بختم هالسنه بهالتدوينه , بالعاده تكون شخصيه بس هالمره غير حبيت تكون مقتطفات و ابرز الأشياء اللي حابه أتكلم عنها بهالسنه قبل تنتهي


{ الفاشن }

شتاء هالسنه مافيه مناسبات وماحضرت له ابد وبما اني بمكان حار ف نادرا تكون عندي قطع شتويه برغم اني احب ملابس الشتاء ونزلت كم تنسيق هنا

من قطع قديمه عندي بس طالعه ترند هالسيزن اختصرته بتنسيقين كاجوال

البلوفر النيون , هالشتا ابرز الألوان فيه كان الأخضر او الأصفر الفاقع , عندي هالبلوفر من سنين ماتقل عن 4 سنوات , لونه تفاحي هادي , خفيف وواسع

كان القطعه المميزه هالشتا ونسقته بتنسيقين

التركيز كان عليه و الإضافات

 

الاضافه الجديده لهالسنه كان هالصندل , يضيف للبس مهما كان بسيط

هالموديل طالع من فتره طويله بالشوزات , حبيته يكون عندي ف اخترت هالشكل خامته زي الساتان ف نوعا ما عملي فيه نقوشات بكثير الوان و من الأطراف فرو




الشوز رائع صراحه لو عندي مشوار او طلعه سريعه و احتاج يكون شكلي مرتب فيها البسه مع العبايه ويضيف كثير لها

قررت من بعده اطلب نفس الموديل بس بشكل كلاسيكي بحيث استفيد منه اكثر خصوصا مع العبايه



البلوفر زي ماقلت واسع و خفيف ف لبست داخله قميص رسمي و طلعت الياقه , معاه جينز 



طبعا الشوز مع الكلاتش لونه ما بين البيج او رمادي , برضو من القطع اللي لبستها هالفتره مره حلو وشيك
 الللوك طالع كثير رايق وترندي



ثاني تنسيق , غيرت البنطلون اخترته بيج بسحابات من الأطراف تحت 


الشوز قطعه مهمه باللوك , اضفت معاه شنطه قريب اشتريتها لونها اخضر غامق
اللوك رائع و الوانه كثير بس متناسقه وماتشتت

هذا كان فاشن هالسنه و ابرز القطع اللي اقتنيتها له :
البلوفر من فيل فري
الشوز من جولي شيك >> هنا
الكلاتش من جولي شيك >> هنا
الشنطه الخضرا اخذتها ب 20 ريال وفعليا تستاهل خامتها جدا ممتازه ولونها روعه 
بس عندي ملاحظه بسيطه بالسيره حقها حسيت ممكن يتغير لونه ف قررت اشتري لها سير ثاني >> هنا

*

*
*


{ المكياج }

لوكات الشتا ايش ما كانت احب يكون التركيز ع الروج ف رشحت لكم ست درجات من ثلاث براندات أسعارها مناسبه

افون : اخترت لكم درجتين من كولكشن المارك , قوامها كريمي واللون غني وواضح هالدرجتين هم المفضلين عندي خصوصا اليمين من أروع الدرجات لكل وقت

بودي شوب : درجة الأحمر الغامق *توتي* من مجموعة الارواج المات حلوه وثابته ماتجفف الشفايف  بس تحتاج اكثر من طبقه عشان يوضح اللون , اللون الثاني هو البني هالفتره مره حابته وكثير احب اشوفه بلوكات المكياج ف الوحيد عندي من بودي شوب من ارواجهم الجديده لونه واضح و كريمي

ديفاج : براند إيطالي صار عندنا  هالسنه بالسعوديه , موجود ببعض محلات المكياج , اخترت هاللونين العودي و الموف الوانها قويه و مطفيه

سواتش للالوان مع درجاتها * بدون تعديل *

*
*
*


{ مناكير }

احلى الالوان اللي لو احترت ع طول اتوجه لها خصوصا لو ايام طويله راح احطها اختار هاللون حيادي ومناسب لاغلب الالوان , رمادي غامق من زويا 

درجة اللون : GENEVIEVE

*
*



{ يوم مريح } 

طقوس بسيطه ممكن تسوينها لنفسك بيوم تخصصينه لك  بما اننا بإجازة منتصف السنه و الجو بارد

بجامه دافيه مع غطا للعيون وشمعه او كوب , ممكن شرابات *جوارب* شكلها كيوت تضيفينها 


 {DIY  كمادة الرز }

 سبق وشفتها  قبل كم سنه عند اروى >> هنا , وبما اني هالسنه صديقة البنترست وصاير ملهمي الوحيد لقيتها بأشكال كثيره و لطيفه ف قررت اسويها وندمت اني ماسويتها قبل

 

تحتاجين شراب قطني , ارز ني , زيت عطري او فواحه انتي حابتها , مجرد تعبين الشراب بالرز كوبين او ثلاث حسب الحجم اللي تبغينه ونقطي عليها شوي من الفواحه او العطر وخلاص ربطيها كويس وزينيها بشريطه

طريقة استخدامها لمدة دقيقه بالمايكرويف تسخنينها وخلاص تستخدمينها كماده ليدينك لبطنك لظهرك مررره ممتازه وتحتفظ بحرارتها وقت كويس



 باث بومب *كرات البانيو * حسيتها اضافه حلوه تكون للشتا 

من بودي شوب - اسعارهم 10-25 ريال 






وحلو تجمعينها بشكل حلو و تهدينها اللي حابه او حتى لنفسك

حبيت اضيف مجموعه شتويه جديده من ذا بودي شوب , رغوه للبانيو مع زبده للجسم برائحة الفانيلا والمارشملوجدا لطيفه وانا من محبين الفانيلا ف كثير حبيتها 


 
{ طبخه } 

هالسنه كنت حابه اتعلم الجريش

الجريش اكله شعبيه , لها طرقها المنوعه بس انا احب بالطبخ اسلك اسهل الطرق و اطلع بألذ النتائج الممكنه

ف سويتها كذا مره وجدا لذيذه ومغذيه ومره مناسبه لو كنتي حابه تسوينها بالشتا

{ طريقتي مختصره جدا}

المقادير :
* صدور دجاج
* شوفان *حبه كامله *
* ملح , كمون , فلفل , ليمون اسود , صلصة طماطم ,  بهارات منوعه
* مكعب ماجي *ممكن تستغنين عنه *
* بصل
* سمن او زبده
*زبادي

الطريقه :
* ع النار تكشنين صدور دجاج مع البصل و البهارات , بعد الكشنه اضيفي المويه وخليها تنطبخ
* بعد ماتكون نص استوا طلعيها و ابدأي قطعي الدجاج بيدك لقطع صغيره وتخلصي من العظاام
* بمرقة الدجاج نفسها اضيفي 3 او 4 اكواب شوفان *حبه كامله* + الدجاج المقطع وخليه يطبخ ع نار هاديه
* قبل ماتطفين عليه اضيفي 2 زبادي *روب* سائل , وقبلها خففيه بمويه عشان مايتكتل وخليه يطبخ شوي الى ما يتجانس وخلاص طفيه , جربت اللبن وماحسيته زي الزبادي

المسمنه :
شرائح بصل كشنيها بسمن او زبده + صلصه وكمون واي بهارت تحبينها + ليمون اسود مطحون *مهم* + دبس رمان *اختياري لو كنت تحبين الطعم الناطع * + فلفل حار *اختياري*

تكشنينهم سوا الى ان البصل يصير جاف


وبكذا يكون الجريش اخذ راحته وثقل قوامه وصار جاهز للتقديم , اضيفي عليه المسمنه و رشة ليمون اسود

وبالعافيه

*
*
*


{ ابرز مقتطفات هالسنه }



* جربت نظام ديتوكس للجسم لمدة 4 او 5 اشهر , يوم بالشهر اكلي كله يكون نباتي و أحيانا *صحي* , مو بشكل كبير التزمت بالديتوكس بس حاولت بنسبة 98% يكون التزام ونجحت

 ممنوع اكل حيواني ومشتقاته ممنوع شاي وقهوه وتوابعها , ممنوع شوكليت وشيبسات وهالامور , البهارات والسكر والملح والصوصات استغنيت عنها , الاجبان والالبان والبيض استغنين عنها ,  فقط لمدة يوم أحاول اشرب عصاير طبيعيه مويه اكل خضار كثير اشرب مشروبات دافيه نعناع زنجبيل قرفه بابونج ...الخ  لان باقي الأيام مافي نظام واضح امشي عليه

كانت تجربه ممتعه صراحه , حسيت نفسي احتاج اكررها بوعي اكثر بحيث اني احتاجها لمده أطول او بشكل افضل لكن بشكل عام كانت تجربه حلوه حسيت جسمي افضل صح مو وقت طويل او يسمح لي اني احكم على مدى فعالية هالتجربه لكن باليوم اللي اسوي فيه هالديتوكس يكون في راحه و فرق حلو بالنفسيه والنشاط



* صحياً , كان عندي اضطراب بالمعده يجيني بشكل سنوي بفتره محدده *رمضان* وبوقت محدد بالضبط وجدا يضايقني , بعد محاولات و عناء هالسنه الحمدلله قدرت اشخص نفسي و عرفت ايش السبب اللي يخلي هالاضطراب يجيني * نوع معين من الاكل * 

* بالجانب الصحي برضو حسيت نفسي هالسنه كثير اقرأ فيه وبحالات كثير كثير كثير , بأيام من هالسنه رافقت شخص بالمستشفى فتره كانت غريبه , الحمدلله عدت لكن لها تأثير إيجابي بالنسبه لي والناس اللي عاشو هالفتره معاي استشعرنا فعلياً نعمة الصحه يارب لك الحمد


{ حبوب زيت كبد الحوت }

* مكملات غذائيه اخذتها هالسنه وكان لها فرق كبير معاي 
 الكورس لمدة شهر تاخذين كل يوم 6 حبات مقسمه على 3 أوقات بمعدل حبتين قبل او بعد كل وجبه , هالنظام ابد ما فاد معاي وعدد الجرعه كان كبير علي مشيت عليه يمكن أسبوع و كان مأساوي الوضع الحبوب اثرت فيني بشكل سلبي سببت لي جوع شديد شديد لدرجة الم المعده و ضيق في التنفس



وقفتها وقررت انقص الجرعات للنصف بحيث اني اخذ قبل كل وجبه كبسوله وحده فقط , مره فاد معي هالنظام وقدرت اكملها و استفدت منها , أولا بتلاحظين الحبوب تفتح الشهيه بالتالي لاحظت نفسي اكل وجباتي كلها كامله الحمدلله وهذا شي إيجابي لان مجرد انه يتعدل اكلي كل شي بجسمي يتعدل , اظافري وشعري وبشرتي بطبيعتهم تمام ف ماقدر احكم عليها من هالناحيه , لكن بشكل عام حسيت نفسي افضل معاها اعتقد اعطتني الفايتمين اللي ناقصني

*
*


* تعليم : هالسنه حققت هدف مهمل مكتوب من سنوات بطرف دفتر عندي *تصميم الأزياء* , اخذت دوره فيه , عرفت اساسياته اللي اكتشفت اني عارفتها لاني احب هالمجال , مو كثير اشتغلت فيه ولا حاليا توجهي له لكن كان هدف و حققته وجدا مبسوطه من نفسي , وبرضو من الأشياء اللي اضافت لي اللي هو كورس اخذته من جامعة هارفرد * كورس العداله * موجود ع اليوتيوب , و أخيرا تعلمت كثير اشياء اصنعها بنفسي ويكون عندي لمسه فيها وتفكير خارج عن المألوف

*

*

* شخصيا : احب نفسي متصالحه جدا وعندي راحه داخليه من جميع النواحي , بدأت استقل بأفكاري بأشياء اساسيه و جذريه بحياتي , تغيرت شوي في مواقف غيرتني صراحه صرت اتعامل معها بشكل اقوى ومواقف كانت جديده علي , الكتب لها دور كبير بالتغيير الشخصي و السلام الداخلي اللي انا وصلت له , وبكذا اقدر أقول ان الكتب قبل كم سنه كانت هدف اني اصير قارئه و حاليا صارت جزء أساسي بحياتي ولها دور كبير بتغييري للافضل

*

*


* التخطيط : حياتي بدون تخطيط فوضى , انا من الناس اللي اكتب عشان انجز , اكتب عشان اعرف ايش مهامي , اكتب عشان أتقدم ’ اكتب عشان اترتب و ارتب وقتي , ثالث سنه لي اعتمد على تخطيط ورقي امشي عليه وفعلا في فرق كبير جدا بتقدمي يمكن لولا ترتيب وقتي ماكنت  تخطيت ربع من اللي تخطيته , هالسنه قررت اصمم بلانر خاص فيني ان شاء الله بعد هالتدوينه بتشوفون بلانري اللي صممته و اكيد بيكون لكم نصيب منه

*

*

سنه حلوه , أيام جميله , مواقف عدت , ماضي راح بكل اللي فيه , طلعت منه بالخلاصه اللي راح اخذها معاي لباقي ايامي و اكمل عليها و ابني نفسي

انتهت تدوينتي بنهاية هالسنه و لنا لقاء بالسنه القادمه  

{ كل حبي و امتناني لكل شخص وصل لهالسطر } 

ليست هناك تعليقات:

إرسال تعليق