السلام عليكم ورحمة الله وبركاته
هالتدوينه بتكون مخصصه لمشترياتي من ايكيا
على قد شهرته و شهرة منتجاته لكن مو كثير شفت احد يتكلم عنها بشكل خاص ، او بالاصح عندهم منتجات محد يهب فيها وتكون اجمل من المعتاد 🙇
كل منتج برفق معاه اسمه و الرابط وتقدون تبحثون عنه بالاسم ، احيانا تكون مجموعه كامله اسمها واحد ومنها الوان ومقاسات ف كل اللي تحتاجونه البحث
بالعاده قبل اشتري اي شي منهم احدد احتياجي ، بعدها ادخل للموقع او التطبيق ، ابدأ ابحث بالمنتجات و اركز ع مقاساتها ، اخر خطوه و هي المهمه اخذ اسم المنتج و ابحث عنه بموقع البنترست
تطلع لي صور ناس مستخدمينه او استخدامات اخرى له & اعادة تدويره واشياء كثيييير وبعدها اقرر هل اخذه او لا
الافضل لو المنتج ينزل سعره بالتخفيضات ف الافضل طبعا تاخذينه فيها الا اذا كان مايهمك السعر 🙄
الموقع وتطبيق اصحاب ايكيا :
توفر المنتجات تقدرين تشوفينها تحت كل منتج تختارين المدينه والفرع ويطلع لك اذا متوفر او لا ، اذا مالقيتي معلومات عن توافر المنتج اعرفي انه مخلص
اصحاب ايكيا (برنامج النقاط)
سجلي فيه من الموقع او حملي التطبيق ع جوالك و بكل مره تحاسبين فيها اعرضي الباركود عند الكاشير قبل يطبع الفاتوره عشان يحسبها لك على كل 100 نقطة = ريال
التسوق اون لاين & التوصيل ماجربتهم بس حبيت الخدمه انك تتسوقين وتختارين الاستلام من المتجر يحطونها لك بلوكر احسها حلوه للي ماعنده وقت
نبدأ بالمشتريات 💸
مصباح طاوله | FADO
شكله مختلف عن الابجورات المعتاده وممكن يستخدمون بأماكن متعدده ، من شفته وقعت بغرامه ♥
اخذت ثنتين و استخدمتهم بتجديد غرفة النوم وطالعين تحفه
اخذت ثنتين و استخدمتهم بتجديد غرفة النوم وطالعين تحفه
{ السجادات }
بالعاده اسعارهم مرتفعه شوي بس بمجموعاتهم الجديده لاحظت اسعارهم مررره منااسبه
MORUM
اول سجاده اخذتها مقاسها 230*160 ، خفيفه وتعيش فتره طويله اعتقد خيوطها خيش حسيتها مناسبه لبعض التمارين لانها قاسيه شوي
سعر هالحجم كان 175 ريال بعد التخفيض
الرابط : هنا
VONSBÄK
ثاني سجاد من المجموعه الجديده لهالسنه , مره حابتها الوانها ونقشها وودي اخذ الكبيره منها للصاله بس للحين متردده
منها اربع احجام واسعارهم خرافيه , اخذت اصغر حجم 180*80
الرابط : هنا
KLEJS
هي سجاده صغيره حجمها 80*50 , تنفع دعاسات او للمطبخ خفيفه مره ونقشتها حلوه غير الدعاسات اللي متعارف عليها
اخذت منها ثنتين سعرها 7 ريال
الرابط : هنا
SORTSÖ
مره مره شي جميل هالسجاد حجمها 58*55 حلوه بالممرات تحطين اكثر من وحده او حتى دعاسات عند الباب او عند السرير او قدام طاوله او عند التسريحه , شي مره حلو تفاصيلها
سعرها 15 ريال
الرابط : هنا
{ المنسوجات }
اخذت هاللون من مجموعة GURLI , الوان هالمجموعه كثير ومره حلويين خامتها ممتازه , حجمها 50*50 وتجي غطا بدون حشوه
اخذتها بالتخفيض 6 ريال للواحد
المجموعه : هنا
من مجموعة الهاند ميد اللي منزلينها من فتره اخذت غطا هالمخده
اسرني بألوانه والنقش اللي عليه , حلو تضيفينه مع كم لون بصالة المعيشه كتغيير
اخذته بالتخفيض ب 22 ريال
الرابط : هنا
غطاء لحاف | KUNGSBLOMMA
من المجموعه الجديده , مافيه تفاصيل ابيض عادي واطرافه رمادي غامق انا احب المفارش البيضا لغرف النوم , عباره عن لبس لحاف بدون حشوه ومخدتين ويجي بمقاسات
اخذته ب99 ريال
غطاء | ODDHILD
قماشه قطن مطاط , حجمه 170*120 اخذته لطرف السرير و ع الكنب , حلو سعره وحجمه وممكن تخصصين هالنوع من البطانيات للسفر
سعره 19 ريال
الرابط : هنا
وصلت لنهاية التدوينه
بتكون متجدده , ان شاء الله الشهر الجاي بضيف المنتجات الاخرى اللي حابه اتكلم لكم عنها
سلام
روعةةةةة مشترياتك 😍💗💗💗
ردحذف