اطباق مالحه : الشفوت اليمني & كيكة الخضار ~

السلام عليكم ورحمة الله وبركاته

بدأت تنقص اطباق سفرتكم ولا 😂 ، بهالمناسبه جبت لكم طريقة طبقين جدا سهلين وممكن تسوونهم في العشر الاواخر كتغيير  بما ان اغلبنا بدأ يتنح ايش يسوي على الفطور  🙇

تدوينة اليوم بسيطه و لذيذه ، حضرت طبقين طريقتهم بسيطه وماهي مكلفه 👍

الطبق الاول هو الشفوت 🍃

اكله يمنيه معروفه جدا  ، مع اختلاف نوعية المقادير المستخدمه بس الطريقه وحده ، ماتحتاج لا فرن و لا نار ولا اي شي ، اعتبرها مغذيه ومنعشه

طريقتي هي اسهل الطرق سويتها بالمتوفر بكل بيت 👌

المقادير :

* خبز 4 اقراص

* لبن >> اي نوع

* نعناع، كزبره، بقدونس،  بصل اخضر >> ممكن تكتفين بنعناع و كزبره

* فصين ثوم

* نص ملعقه صغيره ملح

* فلفل اخضر حار >> ممكن تستغنين عنه

الطريقه :

تقطعين الخبز عشوائي، في الخلاط كل المكونات بعدها تصبينها ع الخبز وتخلينه عشر دقايق يتشرب الخليط وممكن تزودينه اذا حسيتيه ناشف

* يقدم مع سلطه او صوص الطماطم

،

،

 🍕 الكيكه المالحه

كنت اصورها كل عصريه في ستوري الانستا و البعض يسألوني عنها، طريقتها سهله و لذيذه مع الشاهي و ممكن حتى لبعض رمضان فطور او عصريه خصوصا للي يفضلون الموالح عن الحالي

المقادير : 

* كوب مويه 

* رشة ملح 
* بيضه 

* ملعقه كبيره خميره

* ملعقه صغيره بيكنج باودر 

* فنجال زيت 

* فنجال سكر 

* 3 ملاعق كبيره حليب نيدو 

* كوب ونص دقيق ابيض

الطريقه :

* نخلط كل المقادير مع بعض ما عدا الدقيق

* اضيفي الدقيق و اخلطيها زين بيصير عندك خليط كيك متجانس بدون كتل

* في صينيه تمسحينها بزيت وترشينها بدقيق وتصبين الخليط فيها

* تنثرين عليها اي اضافات : جبنه ، زيتون ، جزر مبشور، فلفل اخضر، او ترشينها بزعتر وبهارات... انتي و ابداعك

* تخلينها تتخمر نص ساعه و تدخلينها في الفرن وهو حار على درجة حراره متوسطه 30 - 45 دقيقه لين تنتفش وتتحمر من فوق 

،

،

لو طبقتو شي منهم يسعدني تشاركوني صوركم على الانستقرام >> هنا 

اشوفكم بتدوينه جايه

وبالهنا و الشفا ~ ♥