السلام عليكم ورحمة الله وبركاته
من فتره طويله وانا ملاحظه الناس بدأ توجهها للمنتجات الطبيعيه او
العضويه , سواء في الاكل او منتجات العنايه ويكون الحصول عليها غالباً من مواقع
اجنبيه بسبب ندرة توفرها بالسوق او توفرها بأسعار مبالغ فيها
اليوم حابه اكلمكم عن منتجات طبيعيه من موقع رؤى الطبيعه , الموقع
عربي و بالاخص سعودي يقدم منتجات للعنايه بالبشره طبيعيه 100% , شغلهم جدا ممتاز
وبرفيشنال سواء من خدمه او تعليب المنتجات , و يوصل لجميع الدول تقدرون تطلبون اي شي من موقعهم
موقع رؤى الطبيعه : هنا
حصلت لي الفرصه اجرب مجموعه منوعه من منتجاتهم تقريبا من 5 اشهر وانا
بدأت استخدمها
نبدأ بالمنتجات ~
زيت الجوجوبا
* يستخدم للبشره و الشعر
الزيت قوامه ثقيله شوي , بس ترطيبه جدا ممتاز , استخدمه للجسم بعد كل
شاور و يبقى الترطيب مستمر طوال اليوم
ريحته خفيفه جدا وتروح ع طول , مرات كنت استخدمه لأطراف شعري يرطبها
لي
حجمه 100 مل , استخدامه كفاني لمدة شهر فقط للجسم و للامانه كثير
فقدته بعد ما خلصته
انصح فيه و من الممكن ارجع اشتريه
رابط المنتج : هنا
زبدة الجسم بالكرز الياباني
حجمها كبير وكميتها كثيره , ريحتها جدا لطيفه زهور شي رايق جدا ,
ترطيبها ممتازماحسيت فيها ريحه عطريه قويه ف كنت مرتاحه جدا و انا استخدمها لكامل
جسمي
بالنسبه لي تعتبر افضل زبدة جسم " برائحه جميله " استخدمتها
و ارتحت عليها , بالعاده زبدات الجسم المعطره تكون نسبة العطور فيها عاليه في ما
احب استخدمها لكل جسمي
رابط المنتج : هنا
كريم يد باللافندر
حجمه جدا ممتاز , ترطيبه ممتاز خصوصا بفترة رمضان كنت استخدمه بشكل يومي
ليديني وللان باقي فيه النص , مايدبق ولا يدهن باليد نقطه منه لمدة خمس دقايق امسج
يديني فيها , الشي الوحيد اللي ماحبيته فيه هي ريحته ماعجبتني زي الأعشاب او شي
كذا , بس ماتطول شوي وتروح ونتيجته كثير تشفع للريحه
ناسبني وبقوه وناويه اجرب الروائح الثانيه منه يستاهل سعره
رابط المنتج : هنا
الصابون الافريقي السائل
عادي مافيه أي مميزات صابون عادي للجسم , المميز فيه فقط انه طبيعي
ماله أي رائحه او شي اخر ف بالنسبه لي اشوفه ممتاز جدا للأطفال و للناس اللي
يعانون من حساسيه بأجسامهم سواء اكزيميا او غيره , لكن زي أي صابون يحتاج ترطيب
بعده
رابط المنتج : هنا
الصابون المغربي و ليفة الجسم
الصابون حجمه كبير وكميته كثيره , مع العلم ماراح تحتاجين منه الا
كميه قليله تقريبا ملعقه وحده لكل استخدام ف بيطول عندك , قوامه جدا رائعه معجون بين
السائل و الجامد مرن جدا يشبه حلاوة الشعر تقريبا
ليفة الجسم : خفيف قماشها بس فيه شوي خشونه و مع المويه تصير خشنه
اكثر , استخدمتها مع الصابون حقها و عادي حسيتها تفي بالغرض لكن ماراح ارجع اطلبها
برغم اني جربت نوعين من الصوابين المغربيه لكن افضل هالمجموعه اكثر
منهم كلهم
الصابون : هنا
الليفه : هنا
العطورات
جربت منهم رائحتين بوصفهم كلهم تحت لكن شي واحد لاحظته فيهم " تركيزهم
" قوي , بمعنى انه اول ما ابخ منهم لازم اعطس و احس العطر دخل فمي ما اعرف لو
كان انا حساسه منهم او هم فعلا كذا
عطر كلين
اسم ع مسمى ريحته نظاافه بحت , كأن توك متروشه و طالعه جدا منعش خصوصا ف الحر والصباح
, مناسب للي ماتحب ريحة الازهار او المسك او الروائح الثانيه , وممكن لطلاب المدارس أتوقع بيكون
مناسب لهم , ثباته خفيف حق ساعتين بالكثير
رابط المنتج : هنا
عطر باودر
اعترف اني بالبدايه ماحبيته بس بعد اول استخدام طحت بغرامه , جدا
ريحته باودر لطيفه ودافئه ممكن يستخدم للأطفال الصغار ع ملابسهم , مره احب ريحته ع
طول تكون فيني
ثباته اكثر من كلين وهو اللي حبيته اكثر
رابط المنتج : هنا
وهنا صوره جماعيه للمنتجات بعد استخدام 5 شهور تقريبا خلصت اغلبها ~
أتمنى تكون هالتدوينه لطيفه عليكم و اكيد يسعدني تشاركوني ارائكم و
تجاربكم مع المنتجات الطبيعيه سواء من هالموقع او غيره
وشكرا
~
ليست هناك تعليقات:
إرسال تعليق