السلام عليكم ورحمة الله وبركاته
مبارك عليكم ما تبقى من الشهر يارب
قربنا لنص رمضان وبتبدأ اجواء القرقيعان والغبقات وليالي رمضان الجميله ✨
و اكيد نحتاج ملابس لها طابع خاص بهالشهر ، وكثير مايحبون يتخسرون فيها لانها تكون موسميه او مناسباتهم جدا محدود ونادره
تدوينتي اليوم مختلفه عن ازياء رمضان المعتاده ، استخدمت الاشياء الموجوده عندي وماتكلفت ، وبنفس الوقت ماغيرت ذوقي نفس ما هو مثلا احب الكاجوال و ارتاح فيه نسقت لبس كاجول و اضفت لمسه بسيطه عشان يتناسب مع مناسبات رمضان ، ونفس الشي اللي ماتحب الجلابيات
بتلاحظون تنسيقاتي عادي بمعنى ان اللبس عادي القطع ممكن متواجده عند الاغلب بس الاشياء المكمله [ الشنط و الاحذيه و الاكسسوارات ] هي اللي لعبت فيها و سوت فرق كبير 💕
و اكيد لاننسى المكياج وتسريحات الشعر لهم دور كبيييير بشكلك ، تسريحات هالفتره جدا جميله تقدرين تستخدمين الشرايط الذهبيه بالشعر و البنس الكثيره مع ويفي بسيط ...
اول تنسيق مناسب لجمعه كبيره ، القطعه الاساسيه فيه هي هالفستان او الكارديقان طويل مفتوح وله ازرار ذهبيه ، لونه بيج وتفاصيله جدا مناسبه لرمضان ، ممكن تلبسين تحته فستان ساده او جينز وتيشيرت ساده او بنطلون ابيض ~
نسقت معاه صندل ابيض بتفاصيل ذهبيه جدا جميل باللبس وممكن تستبدلينه بكعب حسب المكان ، والقطعه الثانيه العجيبه هي الشنطه عندي من وقت طويل مناسبه كثير مع تنسيقات رمضان 💕
شكلها الاسطواني و الدناديش اللي فيها اعطت طابع حلو
التنسيق مافيه الوان كثير بيج ابيض ذهبي وممكن تعتمدين الاكسسوارات ذهبيه و المناكير و الميك اب عودي 💘
ثاني تنسيق مره مريح عملي وبسيط وينفع للحوامل
فستان شيفون اخضر غامق عندي من كم سنه ، حبيت اضيف معاه صندل صنع يدوي جدا قديم عندي الوانه مناسبه للفستان
والشنطه حبيتها تكون اصفر غامق متناسقه مع الوان اللبس وممكن تنلبس ع الخصر وطبعا حلو معاه اساور عريضه و اكسسوار فيه حركه ف اضفت هالحلق مواكب للموضه حاليا وكثير حابته
هالتنسيق مره احبه ويمثل ذوقي كثير 🙈✨
بنطلون واسع طوله ميدي اضفت معاه تيشيرت فضفاض سفطت اكمامه ودخلت داخل البنطلون الشنطه الصفرا الصغيره ربطتها ع الخصر و اضفت عليها سكارف بنقشه شعبيه صارت مميزه لرمضان 😎
اساور عريضه ذهبيه مع صندلي المفضل و اللوك طالع بططل 😍
هاللوك بعد محبب عندي , يمكن البعض يلاحظ الواني مكرره ابيض بيج اسود بس هي فعليا الواني المفضله
بنطلون مخطط اضفت عليه تيشيرت ابيض بكتابه سودا ، اعتمدت الشنطه من القش ترندي كثير هالفتره وتعليقتها كرات ملونه ، الصندل نفس الوان اللبس مع اللولو طالع انيق 💘
هالتنسيق جدا لطيف نزلته بالانستا و حبيت انزله هنا مع روابط القطع
البلوزه هي القطعه الرئيسيه تفاصيلها وخامتها وموديلها جدا مميزين , اضفت معاها بنطلون اخضر غامق و صندل بكشكش او رفلز لونه اصفر
البلوزه : هنا
الصندل : هنا
البنطلون : ماكس
و اخيرا هالتنسيق برضو نزلته بأول ايام رمضان
جلابيه لطيفه مافيها تفاصيل كثيره مجرد جيبين كبيره و كشكشه ع الاكمام , طولها ميدي
لبست معها الصندل الابيض مع حلق كبير بنفس الوان الجلابيه وشعري سويته ظفيرتين فرنسيه
الجلابيه : تفصيل
الصندل : هنا
وبكذا انتهت تدوينتي اتمنى حبيتوها و استفدتو منها , تعليقاتكم كثير تعني لي ف ياليت تتركونها لي تحت
اشوفكم بتدوينه قادمه
وشكرا ~
الشنطة مالها رابط
ردحذفموضوعك كثير حلو وغير متكلف .. بسيط وجميل 😍👌🏽♥️
ردحذف