السلام عليكم ورحمة الله وبركاته
" اللهم سلَمنا لرمضان وسلَمه لنا وتسلَمه منا متقبلا " 💓
كل عام والجميع بخير و الله يتقبل منا صالح الاعمال ~
تدوينة هالسنه موسميه زي كل سنه تجهيزات لرمضان , للامانه اشتغلت عليها من وقت طويل و اخذت مني جهد كان ودي انزلها بداية الاسبوع بس ما اكتملت خصوصا اني استنى شحنه توصلني فيها اغراض للتجهيزات وللاسف ليومكم ماوصلت ~ "خيره"
رمضان 2016 >> هنا
رمضان 2017 >> هنا
ببدأها بفيديو استفتاحي 💙
قاعده اساسيه للحين ماشيه عليها : استهلك الموجود عندي , اطلع بأفضل النتائج بأقل الخسائر 💘 , جمعت الاشياء اللي تناسب هالشهر وممكن تخدمني فيه بعدها خططت ايش ابغا اسوي , ودائما التغذيه البصريه تفيدك كثير وتخليك تبتكرين اشياء جديده ف تابعو افكار كثير مقاطع فيديو , البنترست من افضل المواقع اللي بتلاقين فيها اشياء مميزه وتلهمك كثير
ثيم هالسنه الذهبي ونجوم 3D هي اكثر شي حبيته و اعتمدت عليه , حبيتها تكون بالذهبي و اضفت فضي معها , طريقتها بالفيديو فوق و استخدمت معها ورق A4 , الورقه لازم تكون مربعه عشان تطلع لك النجمه بشكل حلو و كل ما بغيتي حجم اكبر كبري الورقه
استخدمت هلال كبير من الكرتون و ودبست عليه ورق عشان يكون بارز , و اخيرا بخيته بالذهبي
صحن صغير جانبي عندي كان لونه فضي وتغير ف حطيت طبقة لون اكريليك ابيض عليه و بعدها بالقليتر الذهبي وغرا الخشب وخليته يوم كامل لحد ما جف وصار شكله مميز حلو كديكور
بالفيديو فوق واضح لكم كيف سويت ورد عشوائي على هالمخده , هي لها وجهين الوجه الساده حبيت اسوي فيه حركه و اضيفها للكنب , بقماش شيفون قصيت قطعه مستطيله وخيطت الجنبين وسويت ورود عشوائيه وثبتتها عليها بغرزه بسيطه 💝
وهنا الشكل النهائي للصاله ~
الابيض و الاسود والذهبي والبيج هم الوان صالتنا ف اضافة الذهبي والفضي جدا مناسبه لهم
اضفت خداديات منوعه و شال يجمع بين الالوان
مو شرط يكون تغيير جذري بس حلو تضيفين اشياء بسيطه او تغيرين بألوان الخداديات بيحسسك بفرق كبير , دائما وقتي تغييرك للمفارش او الصاله يكون قريب رمضان شعور جدا حلو ان الكل متجهز له ومنتظره خصوصا الاطفال 💘
الشال طرحه قديمه عندي ف حبيت استفيد منه
باقي الخداديات انا مسويتها و الخداديات المربعه من جولي شيك تجي غطا بدون حشوه قماشها زي الخيش
*
*
صينيه عندي من اول حبيت استفيد منها
طلعت جوانبها ولبست بقماش مناسب ثبتهم بالدباسه و رجعتهم اماكنهم
صارت كشخه ومناسبه لرمضان كصينية تقديم او ديكور ع الطاوله
*
*
*
تعليقة الباب , حلوه عند باب الاستقبال او االشقه او مكان تجمعكم صاله او اي كان
هلال بالكرتون وبقايا النجوم ثبتهم على طاره حق الخياطه وزينتهم بالانوار المضيئه 💙 >> لاحظو حركة الهلال انه حرف الراء 😂
من اهم الاشياء برمضان البخور , حلو تجددين كل سنه بمبخره بسيطه وعود مخصص لهالشهر
اكيد طبعا الاجواء الروحانيه منم اهم الاشياء , دائما خصصي لنفسك ركن للعباده و اذا ممكن تغيرين السجاده و جلال الصلاه 💗
من المشروبات الاساسيه برمضان الى جانب السوبيا >> اهل الحجاز بيعرفونها , الفيمتو صار شي اساسي برمضان 😋
*
*
*
حطيت لهم خلفيه كرتون وجمعت فيه صور من المجلات وجلدته بتجليد كتب شفاف عشان احافظ عليه
ركبت عليه الرفين بجنب بعض وكثير مهم تراعين سمكهم و عرضهم و المسافه بينهم وبين الرخام و الادراج
ركبت عليه الرفين بجنب بعض وكثير مهم تراعين سمكهم و عرضهم و المسافه بينهم وبين الرخام و الادراج
تحطين فيهم اللي تبغين مثلا الصحون المستخدمه بشكل يومي , الاكواب , صناديق او اي شي تحطينه بشكل جمالي و اكيد النباتات تضيف جو حلو و حياه للمكان 💚
الشي المهم الثاني اللي فعلا يضيف للمكان ويفرق هو شريط الاضاءه مفروض اضيفه لهم بس ماوصلني للحين >> بالشحنه المنتظره , حاليا حطيت اضائات بشكل مؤقت و اكيد برجع احدث التدوينه اذا ركبت اضائتهم
*
*
*
واخيرا هدايا بسيطه لرمضان هالسنه للاهل والجيران او القرايب ...💝
اول هديه غير مكلفه جدا لطيفه , استخدمت براد شاهي ممكن تحطين داخله قهوه مغلفه او بهارات وزينته بالورد , فيمتو و تمر جمعتهم بصحن بنقوش شعبيه ممكن تضيفين لها فانوس صغير او اي اضافات حابتها مع عبارة تهنئه , ممكن تكتبينها ع البراد 😍
هالسنه برضو بودي شوب موجودبن معنا بهديه مميزه بشكل غير عن العد التنازلي حق كل سنه
هالمره الكالندر فيه عشر صناديق فقط , عد تنازلي للعيد , منتجاتها بالاحجام الكبيره و الحلو سعره 299 ريال
حلو كهديه لاختك او صديقتك خصوصا موسم مناسبات نجاح , تخرج , رمضان , عيد ف تستمتع فيها و تصير ليلة العيد عندها مجموعة مكياج و عطر جديدين
وبكذا انتهت تدوينتي اتمنى استمتعو فيها و اكيد انتظر تعليقاتكم تحت
ليست هناك تعليقات:
إرسال تعليق