(( وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ )) ✨
هاذي التدوينه بلا مبالغه بتكون هي اهم تدوينه موجوده ع البلوق، مو تقليل من مجهودي بس في اشياء اساسيه ومهنه بحياة الانسان من ضمنها هالتدوينه و اتمنى فعلياً كل وحده تقرأها تستفيد منها ، ماهي فلسفيه ولا طبيه ولا اشياء ممله مو اي احد يتقبلها ، هي تجربه شخصيه و لك الحريه بعدها بإتخاذ قرارك
قبل سنه من الان اخذت دوره (اون لاين) عن الاسعافات الاوليه🚑، من زمان ودي اخذ كورس عملي عن الاسعافات الاوليه بس للاسف مالقيت ، من وجهة نظري انها شي اساسي لكل انسان واجب عليه يتعلمها ومن المفروض انها تٌدرس بجميع المراحل ولكل التخصصات 🙇
الاسعافات الاوليه ماتقتصر ع الاطباء ولا على اي شخص بالمجال الصحي، هي شي اساسي مفروض كلنا نعرفه بالاخص الامهات، كم مره طفلك تعرض لإصابه او موقف اكل شي او حط يده ع نار او انخنق او غص بالمويه لو ماتصرفتي خلال كم دقيقه فقد حياته *لاسمح الله* ، اي احد فينا مٌعرض لاختناق، لحريق، لغرق، لضربة شمس، لبلع اللسان، الصرع... الخ كيف ممكن تتصرفين لو شخص من اهلك انصاب قدامك ^غير الصراخ^ ؟ 🌚
هالكورس اللي اخذته مايتجاوز شهر ، بعدها بأسبوع بالضبط من نهاية الدوره حصل موقف معي اختناق اخوي الصغير بحلاوه سدت مجرى التنفس بشكل كٌلي وكان ممكن لو ما تصرفت بشكل صحيح او خلال دقايق بسيطه كان مات مختنق خصوصا ان محد حولنا 🤕 على طول طبقت اللي تعلمته والحمدلله جات سليمه 😥
الكورس تعلمت فيها كل الاسعافات الاوليه لاغلب الحالات اللي نتعرض لها من الشي البسيط الـــــــى الانعاش القلبي الرئوي [CPR] 🤓 ، الدوره جدا ممتعه والشرح بسيط وسهل الواحد يستوعبه ومدة المحاضرات ماتتجاوز الخمس دقايق ، صح التطبيق العملي يثبت المعلومه بشكل اكبر لكن كون انك عندك وعي بهذا الشي يطمنك اكثر انك قادره تتصرفين 👍
الدوره مجانيه للكل بس المطلوب منك تسجلين بالموقع، موقع او منصة ادراك وتلتحقين بالكورس وتتابعين المقاطع والشرح وبعدها تاخذين شهادة الحضور 😊
الدوره الثانيه بتبدأ في اغسطس ف موقع رواق و ان شاء الله بسجل فيها ♥
هنا الرابط : https://www.rwaq.org/courses/first_aid
🔴** تنبيه ** 🔴 اللي بتتعلمينه في الدوره مايصير نهائياً نهائياً نهائياً تطبقينه على شخص سليم ✋
شاركو التدوينه مع اكبر قدر ممكن عشان الناس تستفيد
وشكرا ~
ليست هناك تعليقات:
إرسال تعليق