السلام عليكم ورحمة الله وبركاته
من فتره طويله ما دونت عن المنتجات الشهريه
هالتدوينات احبها لان تحمسني استخدم و اخلص منتجات اكثر و اتكلم عن براندات كثير , كل المنتجات اللي بتكلم عنها بهالتدوينه هي منتجات عنايه 💫
نبدأ ~
حابه كثير اني اتكلم عن هالمجموعه من بودي شوب 💛
مجموعة حليب اللوز والعسل , تقريبا لها يمكن سنه او تسع شهور عندي , استخدمتها كلها و خلصتها
واضح من مكونات المجموعه انها ترطب كثير , ف بالنسبه لي ممتازه للبشره الجافه و الحساسه خصوصا بالبرد او المناطق الجافه مناسبه جدا هالمجموعه
زبدة الجسم : ترطيبها مره حلو ماهي زبده ثقيله لا تعتبر كريم تمتصه البشره ومايدبق او يزعج , احب استخدمها وقت النوم لكامل الجسم
اللوشن : ترطيبه اخف بشوي من الزبده احب استخدمه بعد الشاور يخلي جسمي مرطب و ريحته اخف من الزبده
حليب البانيو : المفروض تحطينه بالبانيو وتسترخين فيه بس عني انا استخدمته ك شاور جل وكثييير حبيته
كريم الاستحمام : نفس فكرة الصابون السائل بس هو عباره عن كريم ف مايعطيك احساس الجفاف
الشي الوحيد اللي ماحبيته هو ريحتها شوي قويه واضح ريحة العسل و الحليب و اكثر شي بزبدة الجسم بس مع الاستخدام عادي تعودت عليها و تقبلتها , لو بنصح بهالمجموعه يمكن اكثر شي عاجبني حليب البانيو و اللوشن ومطلعين كريم يد حابه اجربه قريب مكوناته بتكون ممتازه جدا لترطيب اليد
نكمل مع مجموعات بودي شوب , مجموعة الفراوله 💟
اللي يحبون ريحة الفراوله بتعجبكم هالمجموعه وبقوه عني انا ما احب ريحتها بس استخدمتها اكثر شي بالبيت و عادي خلصتها
معطر الجسم احب ارشه ع بجايمي , العطر المركز نفس الشي استخدمه لملابس البيت , الشاور جل حلو وريحته ماتثبت بالجسم
زبدة الكرز : نفس اي زبده ترطيبها حلو يجلس كل اليوم بدون مايحسسك انه ثقيل , ما احب استخدمها كثير ع جسمي بسبب ريحتها بس استخدمها لرجولي
مقشر الفراوله : اكككثر شي عجبني , حبيباته كبيره تقشيره يعتبر خفيف , احب استخدمه اذا بسوي حمام سريع
لوشن موية الورد من افون : ترطيبه متوسط , بس حلو بما انه لوشن استخدمته وقت طويل ومرتاحه عليه ريحته ماهي مزعجه , حجمه يعتبر ممتاز
كريم اليد من جرجنز : المنتج مكتوب عليه انه يوحد اللون , ما اعاني من تصبغات ف عالنقطه ماتهمني , ترطيبه لطيف ع اليد
كريم يد بورو بلس 💚
هالكريم عندي من زمانن بس استخدمته من رمضان , تقريبا لي 8 شهور عليه ,قوامه و ترطيبه ثقيل , مره ممتاز للقشور الخفيفه اللي تطلع باليد , الجفاف اللي من الغسيل و الجروح السطحيه البسيطه اللي تطلع من شغل البيت احب كثير استخدمه لها ويعالجها ع طول
افضل وقت لاستخدامه وقت النوم استخدمه لكل كفوفي ومنطقة الاظافر و ادلك يديني بمساج خفيف بالكريم
المشكله الوحيده فيه ريحته مزعجه تذكرني بمحلات العطاره و الصوابين القديمه بس بصراحه مفعوله يشفع له كثير وحجمه كبير وسعره جدا رخيص من بنده بحدود 8 ريال
ما اعرف بس حسيت لازم احط هالتنبيه لاني احس ما بيناسب اللي عندها اكزيميا او حساسيه , الافضل تقرأين مكوناته او تسألين طبيبك
كريم العين من ايفا بي وايت *لتفتيح الهالات*👀
هالبراند لطيف جربت منه مزيل عرق وكتبت عنه >> هنا
حبيت اجرب منه هالمنتج وللامانه انا اخذته كمرطب لمنطقة العين مو عشان يخفي الهالات لان ادري ماراح يخفيها لي
كترطيب عادي قوامه خفيفه , المنتج نفسه حسيت فيه زي اللمعه , ماحبيته و حسيت مايسوي اي شي غير الترطيب البسيط
سعره 9 ريال , موجود بالصيدليات و بنده
كريم فيتامين e من بودي شوب 💗
بالمنتجات اليوميه يهمني كثير الترطيب لان بشرتي الحمدلله مافيها مشاكل ف ترطيبها يعتبر شي اساسي عشان يجنبني القشور و البهتان اللي فيها
المننتج قوامه خفيفه , حلو مره كإستخدام يومي , ممكن قبل المكياج للي بشرتها تتقشر , بالنسبه لي كثير عجبني مريح استخدامه لطيف ع البشره حبيته وقت الصيف يعطي ترطيب بدون احساس اللي يكتم البشره , احس اللي تحتاج بس ترطيب بيكون مناسب جدا لها
برضو من ناحية الترطيب اللي مو حابه كريمات عندها هالسيروم الكوريمن اتز سكن 💧
قوامه مائيه , مناسب لكل البشرات , وظيفته الترطيب فقط , ريحته جدا رايقه , تمتصه البشره بسرعه ومريح ع البشره لا يحرق ولا يسبب احمرار ولاقشور
ممكن تخلطينه مع كريم الاساس اذا كان ثقيل , او تستخدمينه قبل المكياج
في عندهم انواع ثانيه من نفس السيروم ناويه اجربهم و ارجع اطلب من هذا
سعره 50 ريال فقط 💜
موجود بلينو شوب , طريقة الطلب و رابط المنتج >> هنا
كريم طاش ما طاش او كريم الطيبين او كريم رقيه *ههههههه* اختلفت المسميات لكن اسميه انا كريم ابو ورده
استخدمته قبل الشاور للشعر اذا ماكنت حابه احط زيت او ماسك , ما كان يعجبني بس لاحظت انه يخفف النفشه اللي تكون ف الشعر
بالاساس هو مو ثقيل قوامه خفيفه ويتوزع بسهوله , في ناس يسوي فرق بشعرها عني انا لاحظت انه يهجد الشعر المتطاير ويخفف النفشه فقط
موجود عند العطارين و سعره رخيص مايتجاوز 10 ريال
غسولات الوجه
الموف من ايفا بي وايت : خال من الصابون ’ من مكوناته الجلسرين , يستخدم لازالة المكياج >> مكتوب عليه
عني انا احب استخدمه كغسول يومي اذا بشرتي نظيفه اصلا قبل النوم احب اغسلها بهالغسول بصراحه انا اشوف اللي ماتستخدم مكياج بشكل يومي وبشرتها بالاساس تكون نظيفه حلو نهاية اليوم تستخدم غسول زي هذا لان مايجفف بس يشيل لك الاوساخ السطحيه من البشره ف شي لطيف جدا , سعره 10 ريال
غسول الكولاجين الكوري : هذا عكس الاول , منااسب لبعد المكياج او للشبرات الدهنيه لان نقطه منه تطلع رغوه كثير وينظف من قلب و اكيد جفاف بعد كل ذا ف يحتاج ترطيب
سامبلز شاور جل للجسم من بودي شوب
حبيت اتكلم عنهم لانهم موجودين بالمحلات حق بودي شوب وينباعون بنفس هالحجم
الحجم جدا لطيف مناسب للسفر عني انا احطهم بالشنطه اللي تكون لبرا البيت اذا بسافر كم يوم او بنام عند احد احب اخذهم معي و استخدمهم , العلبه الوحده تكفي تقيبا 5 او 7 استخدامات , كلهم حلوين وروائحهم لطيفه
اخيرا حابه اتكلم عن بعض الشيت ماسك اللي استخدمتهم 💭
بدايةً هالنوع من الماسكات هو استخدام واحد ومفعولها مؤقت ف بالتالي ماراح يعطيك نتيجه جباره , ماراح يعالج لك مشاكل بشرتك , اقصى شي ممكن يسويه ينعش البشره ويرطبها لك بشكل مؤقت فقط
💢 عشان كذا حلوين قبل المناسبه ممكن تستخدمينها قبل المكياج بساعتين تحطين الماسك بعدها تشيلينه
💢 حلوين وقت السفر لان محد يكون فاضي يخلط ماسكات او هالسوالف ف حلو كمحافظه ع ترطيب بشرتك
💢 حلوين اذا كنتي تعبانه ومالك نفس تسوين شي وتبغين ماسك يعطيك شوي انتعاش للبشره >> احبه بهالحاله كثير
هذا اروع ماسك استخدمته , بالاساس شكله لطيف ويحمس 💘
بفتره من الفترات جاتني انفلونزا شنيعه لمدة كم يوم , قمت بعدها وبشرتي منتهيه شاحبه وذبلانه ف استخدمت هذا الماسك لمدة نص ساعه او الين نشف بعدها شلت القطعه الورقيه وغسلت وجهي , حسيت بشرتي تغذت ومترطبه بشكل لطيف يعني فعلا غير لي مودي غير ريحته لطيفه
ماسك الشاي الاخضر من اتز سكين >> نفس ماركة السيروم الازرق 💧
مافيه شي جديدزي كل الماسكات ينظف البشره مع شوي ترطيب فقط
ماسك الصبار
ترطيب ترطيب وترطيب مع شوي نظافه ببشرتك
*
*
*
انتهت تدوينتي لليوم , اكتبو لي لو جربتو شي من اللي ذكرتهم
اشوفكم بتدوينات قادمه ان شاء الله
وشكرا 💖
ليست هناك تعليقات:
إرسال تعليق