مجموعة ماسكات الطبيعه من بودي شوب | The body shop masks set ~

السلام عليكم ورحمة الله وبركاته

تدوينة اليوم عن ماسكات بودي شوب تكلمت عنها بهالتغطيه لإيفنت اطلاقها  >> هنا , تقريبا كملت 10 شهور وانا استخدمها 

اعتمدتها ككورس لعنايتي بالبشره , حسيتها من المنتجات اللي ضروري اكتب عنها بالتفصيل

خصوصا ان سعرها يعتبر مرتفع نوعا ما 👀

تم اطلاق خمس ماسكات طبيعيه ونباتيه 100% , مناسبه لكل أنواع البشرات ولكل مشاكلها , آمنه للحوامل , مافيها مواد حافظه او كحول ❤

تعليبها ممتاز وكمية المنتج داخل العلبه وفير , طبعا لو بتسخدمينها تجنبي انك تدخلين يدك لانه بيخرب المنتج ف الأفضل بملعقه خشب او بلاستيك

توزيع الماسكات افضل شي يكون بالفرشه , وما احدد  فرشه معينه لا أي فرشه ممكن تفي بالغرض انا عندي فرشه من بودي شوب مخصصه للماسكات وعندي فرشه ثانيه سعرها اقل من 5 ريال وكلهم نفس الشي , لانها تأخذ من المنتج الكميه اللي تكفي وجهك ورقبتك وتوزعها بشكل ممتاز👍

* نقطه مهمه * الماسكات انصح انك تحطينها ع بشره نظيفه تماما عشان تعطيك نتائج ممتازه

وشي ثاني ممكن تستخدمين كل ماسك على منطقه معينه مثلا ماسك الفحم ينظف و انتي عندك منطقة الانف فقط تدهن بكثره وفيها مسام ف حطيه على المنطقه , منطقة الخد فيها قشور او جافه حطي عليها ماسك العسل او ماسك الورد ... وهكذا

*

*

*

ببدأ بشرح كل ماسك ورأيي فيه :

( ماسك الجينسينغ الصيني والرز )

من اروعهم صراحه , يعطي ترطيب و نضاره للبشره ومع الاستمرار يوحدها ويخفف من اثار البقع , الرز من الأشياء اللي تعيد للبشره حيويتها ونضارتها وتساعد في توازنها , حسيته فعلا يغذي البشره

قوامه زي الكريم وفيه حبيبات ف تساعد ع تقشير البشره وقت ما تغسلين الماسك

انصح فيه صراحه وصار جدا مهم عندي , بالنسبه لي من الماسكات اللي برجع اشتريها لان ماله بديل بماركات ثانيه

سعره 119 ريال

( ماسك فحم الهملايا )

حسيته مناسب للبشره الدهنيه اكثر وما انصح اذا كانت بشرتك متقشره وحساسه , يطهر و ينظف البشره تنظيف عميق خصوصا المسام

الماسك اذا حطيته احس بلسعات في بشرتي ف صرت احطه بالاماكن اللي تدهن اكثر مثلا الجبهه و الانف

قوام الماسك فيه أجزاء من الفحم بشكل واضح , اذا نشف تحسينه زي الماسكات الطينيه , يجفف البشره طبعا ف تحتاج لترطيب بعده

بالنسبه لي حلو وينظف البشره مره كويس بس لان بشرتي مو دهنيه و ما اعاي من المسام ف ما اعتقد برجع اشتريه لان له بدائل جربتها ع بشرتي و اعطتني نفس النتيجه اللي هي الماسكات الطينيه تكلمت عنها >> هنا

سعر الماسك 119 ريال

( ماسك الاكاي )

المكون الأساسي فيه توت الاكاي , الماسك يوعد بمحاربة مظاهر التعب ف يعطي اشراقه وينشطها ويصفيها

قوام الماسك زي المربى , بالنسبه لي عادي , أحيانا يهيج بشرتي احس بحراره و احمرار مؤقت اذا حطيته بس ما انكر انه ينظفها وتصير ناعمه

كثير تجارب حبوه وكثير بنات نفس رايي فيه , البشره الحساسه ما انصحها فيه بس مناسب لباقي أنواع البشره

ما راح ارجع اشتريه لان ما ناسب بشرتي , سعره 119 ريال

( ماسك العسل الاثيوبي )

يوعد بتغذية البشره وترطيبها ونعومتها 

الماسك حلو لترطيب البشره فعلا ترطيب عميق ف مناسب للبشره الجافه , بالنسبه لي أي عسل يعطيك ترطيب وبما انه انا العسل شي أساسي للبشره واستخدمه كثير ف ما لاحظت أي فرق في النتيجه

الفرق في تركيبة المنتج , هذا مخصص انه يكون قناع للبشره ف مايدبق وسهل بالتوزيع , بينما العسل العادي يدبق ع البشره وصعب توزعينه بسهوله

استخدمه كثير بشكل شبه يومي او احطه بعد أي ماسك يجفف البشره

بالنسبه لي ماراح ارجع اشتريه لان زي ما ذكرت فوق العسل العادي يعطيني نفس النتيجه

سعره 119 ريال

( ماسك الورد الإنجليزي )

تعمدت أتكلم عنه اخر شي لانه العششق , اكثر ماسك حبيته فعلا من بينهم مكوناته رائعه و غير كذا ريحته شي خيالي

الماسك يوعد بإنعاش البشره وحيويتها و إعادة امتلائها , من مكوناته اوميجا 3 و الصبار ف بالتالي اذا كانت بشرتك متهيجه بيخففها لك

عني انا يعطيني نظافه و نعومه وترطيب واشراقه , يهدي لي بشرتي اذا كانت متهيجه وينعشها لي , ريحته تروقني كثير

طبعا راح ارجع اشتريه , سعره 119 ريال

*تحديث* 

ماسك شاي الماتشا 💚

هو قناع جديد انضاف تقريبا في بداية 2018 لمجموعة اقنعة الطبيعه 

شاي الماتشا هو شاي اخضر بس يختلف بطريقة الزراعه و الانتاج والمعالجه 

القناع ريحته اعشاب , يلسع شوي ف البدايه خصوصا لو البشره متقشره او متحسسه 

بس جدا حبيته يطهر البشره ومكتوب عنه مضاد للاكسده , ينظفها من الدهون و الملوثات , يعطيها حياه كذا يسوي لك ريفرش 

لكن يحتاج ترطيب بعده خصوصا للبشره الجافه 

من الاقنعه اللي حبيتها صراحه 

سعره 99 ريال 

*تحديث2019*

قناع الشوفان و حليب اللوز ✨

مناسب للبشره الجافه و الحساسه ، قوامه مو ثقيله بالعكس سهل ف التوزيع ومايحوس ، تستخدمينه ع بشره نظيفه بيغذيها ويعطي ترطيييب 💛

مكوناته كلها طبيعيه و ڤيقن ، عني انا حبيته بس مو اللي برجع اشتريه لان انواع ثانيه من هالمجموعه ناسبتني اكثر 👌 

*

*

*

زي ما قلت الماسكات سعرها مرتفع وكميتها كبيره ف ممكن انتي و اخواتك تتشاركون فيها كل وحده تشتري نوع لانه بيطول معك الماسك , انا صار له حدود السنه عندي مع اني استخدم كل واحد اكثر من مره في الأسبوع و احطه لي و لاخواتي وغيرهم وللحين فيه 

طبعا انسألت عن علبة الماسكات للأسف هي ماتنباع , كل واحد لوحده ينباع ف ياليت الشركه تطلع نفس هالعلبه شامله كل الماسكات لان حسيتها حلوه كهديه

وبكذا انتهت تدوينتي , انتظر تعليقاتكم عليها تحت و اكيد يسعدني تشاركوني بأنواع الماسكات اللي جربتوها

وشكرا ~💖