طريقتي بإزالة شعر الجسم ~

السلام عليكم ورحمة الله وبركاته 

من اساسيات العنايه بالجسم والبشره هي ازالة شعر الجسم 

راح اتكلم اليوم عن اغلب الاشياء اللي جربتها بإزالة شعر الجسم 


بدايةً من وجهة نظري افضل الحلول للجسم ماعدا الوجه ( الليزر) قرأت عنه كثير كثير كثير ولازلت اقرأ وجدا مقتنعه فيه و ان شاء الله تجي الفرصه المناسبه و اسويه 

بالنسبه للوجه الى الان ما اقتنعت فيه للوجه خصوصا للي شعر وجهها مو مبين زيي لان قرات تجارب سيئه مع الليزر تبع الوجه سواء كانت حروق دائمه او حبوب او نتيجه عكسيه وتكاثر الشعر بشكل رهيب ف صرفت النظر عنه تماما 

ف الافضل لازالة شعر الوجه الفتله من بعدها الحلاوه بس ما افضلها لانها ممكن تسبب ترهل للوجه 

نصائح :

اذا عندك مناسبه ضروري قبلها بيومين تشيلين شعر جسمك عشان لو صار احمرار او بقع او حبوب يمديك تتصرفين 

من بعد ازالة شعر الجسم ضروري تغسلين بمويه بارده و لوو معاها موية ورد يكون افضل 

وللوجه من بعد ماتغسلينه تستخدمين كريم فيوسدين او سودو عشان الحبوب والتهيج

ماتستخدمين مواد عطريه مباشره ع الجسم و برضو منطقة الابط من الاغلاط انك تستخدمين عليها ليمون او ديودرينت عطري و الخلطات والتقشير يفضل تخلينها بعد ازالتك للشعر بيوم او يومين لان البشره وقتها تكون متهيجه 

*
*
*
*

نبدأ ..

حلاوة الشعر 

وبالحلاوه اقصد الاصليه من عند العطارين مو اللي طلعوها جديده بالصيدليات

 زمااان ما استخدمتها بس فعليا جدا جميله نتايجها مرضيه & تساعدك بازالة الجلد الميت ع البشره
مشكلتي معاها متعبه بالازاله يبغا لها تجلسين بغرفه بارده عشان ماتذوب بيدك & مؤلمه ف ماتحملتها 
بس طبعا بين فتره وفتره احب اني استخدمها لبعض المناطق 

~

شرائح فيت الشمعيه 

تجي للشعر و الجسم جربت الثنتين تجربتي معاها سيئه ماحبيتها ماتشيل الشعر ابدا 
ما انصح فيها 

~

اداة ازالة شعر الوجه 

موجوده ببعض الصيدليات ومحلات الكماليات 

صحيح تنتف الشعر بس من اسوأ الاشياء اللي جربتها جدا مؤلمه وماتحملتها ابدا 

طريقتها تمسكين اطرافها الملونه ذي بيدينك وتحطينها بوجهك بنفس شكل الصوره وتفرين الاطراف وهي راح تبدا بالنتف 

طبعا ما انصح فيها بسبب ألمها

~

آلة براون للجسم و الوجه 

من افضل افضل افضل الاشياء اللي جربتها بحياتي 

ألمها محتمل نتيجتها جدا مرضيه تشيل لك كل شعر الجسم 

عيبها الوحيد انها بالشحن تشتغل

لها رأسين واحد تركبينه ويخفف لك الالم لو ماتحملتي والثاني فيه فتحه قد عرض اصبعك مخصص للوجه وبعض المناطق 

استخدمتها لوجهي و جسمي و جدا حابتها والشعر تقريبا من ثاني او ثالث اسبوع يبدأ يطلع 

بالنسبه للاله عندي من حدود 6 سنوت سعرها 170 ريال من اكسترا او ساكو مو متأكده

بس طلعو اجهزه مطوره كثير للي حابه تشتريها 

~

شفرات الحلاقه ( الامواس )

طبعا جميله وعمليه مو متعبه سلبيتها ان الشعر يطلع بشكل اسرع اذا حلقتيه بعكس النتف يطول على مايطلع الشعر 

بالنسبه لي متبعه السنه فاستخدمها دائما للمنطقه الحساسه  والسيقان فقط اسبوعيا تقريبا 

ودائما احرصي انك تستخدمين امواس نسائيه لانها اخف ع البشره من الامواس الرجايه 

الطريقه الصحيحه لاستخدامها :

ادهني المنطقه بزيت او بلسم شعر >> قرات انه يفي بالغرض اذا ماعندك زيت واحلقي الشعر باتجاه نموه مو العكس 

بكذا مراح تواجهين مشكله ان شاء الله 

مشاكل الحكه و الحبوب اغلب اسبابها تكون الحلاقه على بشره جافه او تحلقين عكس نمو الشعر >> راح اتكلم عن العنايه بالمنطقه الحساسه بشكل مفصل ان شاء الله 

~

كريم ازالة الشعر من فيت

طريقته تحطين الكريم لمدة 5-6 دقائق بعدها بالاداه اللي معاه تشيلين الشعر

عادي بالنسبه لي ونتيجته بالضبط نفس الموس 

ريحته مزعجه يمكن الحسنه الوحيده فيه للي تجرح نفسها بالموس بهذا ماراح يكون فيه جروح 

استخدمته فقط للساقين و غلط جدا تستخدمينه للابط او المنطقه الحساسه او الوجه 

وبكذا خلصت التدوينه اتركو لي تعليقاتكم تحت واذا حابين تواصلو معاي هنا

وشكرا ~