فضفضه مبعثرهـ :$ ~

السلام عليكم ورحمة الله وبركاته 

.
.
.
.

راح ابدا بكلمة ما اعرف اعتبروها فضفضه اعتبروها جلسة مصارحه اي شي بالحياه

بس كلام وحابه اطلعه ماراح يفيد بشي


بس اكثر شي حابته اني بعد فتره راح ارجع اقرأه و الله العالم راح اضحك او وش راح تكون ردة فعلي بس اللي متأكده منه راح اكون فخوره سواء بهالشي او مستقبلا بالشي اللي راح اوصل له

’
’
’

بدايتي مع البلوق كانت قبل سنتين من الان ما ادري لو قلت لكم خطوه او قرار عمري ماراح اندم عليه لان اتوقع لو ماني بهالشي الحين يمكن اكون بهالسنه ونص ولاشي او شي سيء للامانه

,
,
,

السبب اللي خلاني ابدأ هالشي او افكر اني اصير بلوقر كان مره سخيف صراحه كنت اتابع يوتيوبر عرب و اجانب وماتتخيلون قد ايش انقهر يوم اشوف بعض التعليقات ماتكون سؤال او استفسار بقد ما انها تكون ترجي ان البنت ترد عليها وتساعدها

حقيقي هالشي يقهرني وخصوصا لو انا اعرف الجواب بس سبعين بالميه ماراح تتقبل ردي لو جاوبت عليها لان مو انا صاحبة الموضوع او بالاصح مافي ثقه ف هالشي كان دافع لي اني اصير بلوقر و ارد على استفسارات البنات بالشي اللي اعرفه !!

 شفتو وش الدافع اكيد ببالكم الحين وش هالسخافه بس جد ما احب احد يحتاج شي من شخص ثاني اكره هالشعور عشان كذا يهمني اوصل المعلومه اعطي قد ما اقدر وما احاول اهتم كم اللي سوو لي لايك ع الانستقرام كم اللي مدري ايش ...

ما انكر اني كل فتره اشيك ع احصائيات مشاهدة المدونه يهمني اشوف في ناس تستفيد او لا ~

,
,
,

الشي الثاني طبعا لاني حبيت هالمجال او حابته من اول ف اشوف نفسي راح اكون سوبر ومن فيه

عندي مبادئ واساسيات بسيطه بسببها انشأت البلوق ماراح اقول مستحيل اغيرها بس كل فتره اذكر نفسي فيها يعني مهما جربت مهما كان عندي معرفه راح ارجع لاساس البلوق اللي هو من الاسباب اللي خلتني افتح المدونه

,
,
,

انا مبتدئه ومهما تعلمت مهما انجزت ومهما نجحت راح اضل مبتدئه هالكلمه ماتحطمني بكثر ما انها تحمسني اتعلم اكثر ابدع اكثر واكتشف اشياء ماكنت عارفتها

جديا سنتين كانت كفيله بأنها تعلمني ولو شي بسيط ع قولتهم من دروس الحياه كثير اشياء تغيرت فيني سواء كانت بسبب البلوق او لا

,
,
,

ولاني حابه هالشي ماشاركت احد فيه ماني مخبيه هالشي بس بنفس الوقت ماشهرت 
بنفسي 

بدايتي كنت محد من اهلي ولا صديقاتي يعرفون الا اختي لان ماكنت مستعده اسمع كلام سلبي او تحطيم وكنت حابه هم يوصلون لي بنفسهم مو انا اللي ادلهم علي بعدها بفتره من بداياتي بدأت انكشف او بدأو يعرفون ف صرت خلاص شفتي يوم تكونين متمكنه بالشي اللي تسوينه ف لو جاتك كلمه حلوه خير وبركه جاتك كلمه سيئه ياجبل مايهزك ريح انا كذا وقتها ولازلت ف احب هالصفه فيني جدا

,
,
,
,

بالنسبه للدعم كنت اسوي تبادلات اعلانيه و من حقي هالشي لاني قاعده ادعم نفسي بعد ما حسيت نفسي يمكن صرت اقوى صرت اراسل الشركات اعرفهم بنفسي وبرضو من حقي هالشي ما استنيت دعم من احد او اعلان او اي شي مع انه كانت تجيني لحظات اصير محبطه فيها بس الحمدلله يارب يصير شي جدا جميل زي الاشاره من ربي انه استمري انتي ناجحه لاتخلين شي يوقفك اسعي ورا الشي اللي تشتغلين عليه بنفس الوقت اعطي عشان يجيك مردود 

مره وحده جاني هالشعور وفكرت اقفل حسابي ولا كأن صار شي سبحان الله ما مرت ساعه الا صار لي دعم من انسانه جد جد احبها اشكرها على هالشي منها فعلا جا بوقته

بعدها صراحه بطلت احطم نفسي صرت اشتغل اكثر اثقف نفسي اكثر احب اكون متطلعه على كثير اشياء اتابع ناس بنفس مستواي وناس اعلى وناس اقل مني كل هالشي يزيدني خبره ومعرفه

حتى لو بعقليات الناس شفت عقليات كثيره كثيره كثيره بسبب الردود اللي تجيني و اكيد كل كلمه حلوه احتفظ فيها و الكلام السيء اشكر ربي على نعمة النسيان ماني من النوع اللي احقد او احفظ السب اللي يجيني >> اللي ببالها تفتح بلوق جديا و حرفيا يبغا لها صبر وطولة بال وقوه لانك بتنصدمين من تفكير كل احد

,
,
,

الاشخاص اللي ما يضيفون لي شي غير اني انقهر اكثر بأسلوبهم ومستوى تفاهتهم وفلسفتهم بأشياء يجهلونها ع طول انفولو ماعندي وقت ولا عندي استعداد اغث نفسي بنفس الوقت مالي حق اهاجمها على اسلوبها او تفكيرها هو اكاونتها كلامها رأيها ومعتقداتها هي عاشت تربت في بيئه غير عن بيئتي صارت لها مواقف ممكن أثرت فيها ف كفي شرك عن الناس

الماديات :

صحيح يضايق اذا ماعندك دخل خاص فيك بس اذا حبيتي شي واخلصتي نيتك فيه كل شي راح يتيسر و بالعكس راح تتعبين وتدورين طريقه وظيفه او تنمين موهبه عندك وتستفيدين منها تفتحين مشروع لك عشان تجيك الماده ..

في بنات صارو بلوقرز وفتحو مشاريعهم عشان يكون داعم لهم وحبو المشروع اكثر ف بطلو شغلة البلوق !!

بالضبط هذا هو احيانا تبين تسوين شي عشان شي وبقدرة قادر تتغير كل الموازين .. خيره ~

البعض صار او كان البلوق دافع لهم انهم يفتحون مشروع سواء كان متجر بوتيك اي شي

كفايه كذا و ادري الكلام مو مرتب وداخل ببعض بس كل فتره افتح هالتدوينه اكملها اكون بوقت غير بمزاج غير >> زي الحين انتظر الطلب من المطعم

ع العموم هي حلاوتها كذا ههههه

لو وصلتي لهالنقطه اشكرك من قلبي والله تحملتي ثرثرتي انتي بطله ❤❤

اخر شي ممكن اوجهه لأي بنت قرأت هالتدوينه لاتستني من احد شي احلمي قد ماتقدري لاتحطي حدود لاتقولي ما اقدر اوضعي ماتسمح اهلي بيوقفون ضدي ... حددي اهدافك ولو كانت كثر شعرك لاتخافين من شي جربي اي شي ودك فيك ممكن تصدف معك وتصير ضربة حظ واخيرا إسعي ❤

وكالعاده اتركو لي تعليقاتكم تحت واذا حابين تواصلو معاي تفضلو هنا ~

احبكم ❤