تجربتي في ازالة الشامه (حبة الخال) بخل التفاح

السلام عليكم ورحمة الله وبركاته

تدوينة اليوم عباره عن تجربه لي في ازالة الشامه (حبة الخال )

عندي شامه مو كبيره قريبه من اذني ووجهي و ابدا مو مضايقتني او شكلها مو كويس ،، بس بما انها شامه حميده يعني ممكن ان حجمها يكبر قلت اجرب اشيلها احسن ~

ف البدايه لازم لازم لازم تكون الشامه حقك حميده يعني بارزه اذا كانت ممسوحه ف الجلد ابدا ماتنفع لك هالتجربه >> قد اعذر من انذر ~

تحتاجين :

 خل التفاح >> استخدمت خل التفاح من قودي + فازلين  + عود اذن + لصق جروح 

شفت مقطع فيديو لبنت منزله تجربتها كامله و توكلت وسويتها 

اضغطي>> هنا المقطع

~

حول الشامه امسحي بفازلين لان الخل يحرق الجلد بعدها حطي بقطنه ع قد الشامه خل تفاح و حطي عليها لصق جروح و كل كم ساعه غيري القطنه ،، 

بالنسبه لي انا سويتها بس ماحطيت فازلين حولين الشامه ف من ثالث يوم صحيت فكيت اللصق ولقيت كأنه اثار جروح او حروق شمس والمنطقه توجعني كأنها كدمه ~

وقفت اليوم كله ماحطيت شي الا فازلين و مرهم ميبو ع اثار الجرح اليوم اللي بعده خف الجرح كثير وتقشر ورجعت بعود اذان كل شوي احط ع الشامه ~

من استخدامي للخل من ثاني يوم بدأت احس الشامه جفت وواصلت الطريقه من رابع يوم صغر حجمها وصارت تقريبا ممسوحه ف الجلد بس مو مره واذا حطيت خل تحرقني بس كملت الطريقه ،،

 خامس يوم خلاص ماصرت احس فيها صارت زي الدم اذا نشف >> معليش ع الوصف بس حقيقه هي كذا

حطيت بعود الاذان شوي خل وحركتها تقريبا تقشرت من كل الاتجاهات خليتها سادس يوم خلاص نشفت تماما وتقشرت وطلعت ولله الحمد ~

بالنسبه لاثار الخل راحت من ثاني يوم استخدمت فيه الفازلين والميبو ،، وتقشير الوجه وقفته لمدة خمس ايام بعد م طلعت الشامه بدأت استعمل ليفة الوجه و المقشر

مكان الشامه مو واضح ابدا نقطه ممسوحه بالجلد مره بسيطه وقشور بس وحاليا بدأت تختفي مع الترطيب

* تحديث *
كملت سنتين ومارجعت لي الشامه ولا صار لي اي مضاعفات او اثار ولله الحمد 

*
*

* للبشرات الحساسه او اللي عندها حساسيه او اي شي انتي ادرى ببشرتك لو ممكن تتقبل وتتحمل الخل او لا لانه يحرق البشره

* اهم نقطه لاتغلطين نفس غلطتي وتنسين تحطين فازلين حول الشامه لان ممكن يبقى الاثر للابد ~

هاذي تجربتي بكل تفاصيلها حبيت انزلها لان البعض عندهم شامات بأماكن مضايقتهم ومايقدرون يشيلونها بالليزر ،،

اي استفسار عندكم اتركوه لي بالتعليقات

وشكرا ♡