السلام عليكم ورحمة الله وبركاته
كل عام و انتم بخير و الله يجعله شهر مبارك علينا وعليكم يارب ويتقبل
منا صالح الاعمال 💛
و أخيرا وصلنا لتدوينة رمضان , اكثر شي بالسنه اتحمس له واشتغل عليه و احب حماسكم معي
من رمضان العام وانا مخططه اشتغل على شي و بدأت اجمع الأفكار وكيف
ممكن اسويه بأقل التكاليف اللي هي ( مدخنه )
منطقة التلفزيون عندي فاضيه وكبيره و عندي مكتبه كبيره بالجهه الأخرى ف
انسب شي لتحت التي في اني احط مدخنه بس طبعا مو حقيقيه اباها بس ديكور لان انا
بمنطقه حاره ف ماراح استفيد منها لو كانت حقيقيه & تكلفتها عاليه لو كنت بس
ابغا هيكل من النجار لقيت أسعارها 500 وطالع , يمكن لو دورت بلاقي ارخص بس
البنترست وفر علي وقت كثير ومال اكيد ’ لقيت فيه أفكار مره كثير بحسب ميزانيتك
اخذت القياسات للجدار و التلفزيون و رسمت الشكل اللي ابغاه وماحاولت
اتكلف فيه عشان مايتطلب مني ميزانيه اكثر
لمدة اربع شهور بدأت اجمع كراتين السن توب لانها تتحمل اكثر ومتوفره
عندي كثير , ومقاسها مضبوط
كل عمود مني اخذ 11 كرتون صفيتهم زين ولصقتهم بغرا مسدس
بالشطرطون الرمادي غلفتهم كلهم , لانه قوي & بيحميها لي اكثر
خصوصا لو جاتها سوائل & يغطي لي لونها المزعج
بينهم حطيت كرتون ولقصته عادي بالغرا وحطيتهم تحت التلفزيون عشان
اتأكد من الشكل لانهائي لو يحتاج تعديل
اخذت هاللاصق زي الجبس بس اعتقد فلين اسمه و اللصق حقه مره قوي ,
الوحده مقاسها 70*75
كتبت عنها هنا
قصيت كل مربع لوحده وبدأت الصقها عشان تعطيني شكل طبيعي اكثر
الرف عباره عن الواح خشبيه قديمه عندي , صنفرتها و عالجتها بالزيت
وثبتتهم ببعض و ع الجدار علقتهم وتحتها المدخنه صارت ثاابته
التكلفه = 55 ريال
ثيم هالسنه ماركزت ع شي محدد اغلبها أشياء من العام استخدمتها بإستثناء
المبخره جات هديه وماشيه مع الثيم الملون
حطيت ع المدخنه الاضائات وعليها هلالات ذهبيه و فوانيس بالورق
<< من صنع اختي الصغيره
هالبرواز و داخله عباره رمضانيه مع اضائات ملونه بأحجام وفانوس صغير
النبته زينتها بخيط خيش و قصيت هلال ولصقته عليها , و النجمه الشفافه
بالاصل علبة ساعه وحطيت داخلها اضاءه ملونه
فازات شفافه حطيت فيها ورد ابيض و عليها خيط خيش وورق اخضر , الشموع
استهلكها كثير برمضان وغيره ف حفظتها بهالعلبه الزجاج
جا ببالي اسوي فانوس كبير بالكرتون وحطيت لكم بستوري الانستا لو ضبط
بتشوفونه
قصيته بهالشكل
وأخيرا غلفته بتجليد اسود وطالع حلو كثير , الفوانيس الباقي قديمه
عندي , العلبه النجمه حق كالندر بودي شوب العام
بيت هالمخده مو عاجبني ف قررت اسوي عليه شكل بالخيوط و الشرائط
هذا اللي طلع معاي و اكثر شي متعبه , مو نفس اللي ببالي بس ماهي بطاله
تعليقة الباب اخر شي سويته ومره طالعه جميله , استخدمت الكرتون اللي
فرغته من الفانوس و غلفته بمنديل رمضاني مع ورد ابيض و عباره رمضانيه بالذهبي و
حطيت عليه النجمه حق العلبه اللي فوق *لووول* و اكيد الشريطه عشان اعلقه ع الباب
ركن الصلاه , موب شرط شي مكلف او جديد عني استخدمت سجادتي البيضا مره
احبها اخذتها ب 5 ريال من محل كماليات , شرشف الصلاه هو الاغلى عندي احبه كثير من
زمان معاي عطرتهم بمسك , و اكيد مصحفي كلهم بركن بسيط ومريح لوقت العباده
للمطبخ سويت معكم هالاعمال قبل كم شهر و مره حبيتوها وحبيت اوثقها هنا
كلها أشياء معاد تدويرها , غطا صندوق رسمت عليه , لوح كانفس غلفته بورق ولوح ثاني جمعت عليه
ملصقات , العلبه الصفرا حق مجموعة عنايه بالجسم , الاشكال الخشبيه حق برش الشعر
وهنا لما علقتها بالمطبخ , البراد الأصفر حطيت فيه نباتات وورد وعلقته
بخيط خيش & علقت المريله حق الطبخ وفوقهم
ركبت اضاءه صفرا
وأخيرا ختام هالتدوينه الهديه الرمضانيه
حلو تهدينها لاهلك او اقاربك او جيرانك , صديقاتك ...الخ
صندوق خشبي مقسم حيت فيه فناجيل قهوه وعلبه فيها بن مطحون و القسم الأخير
سويت بسكوت على شكل هلال
زينت الغطا بورد و أوراق شجر مجففه و ركبت عليه هالعباره تهنئه برمضان
انتهت تدوينتي جدا استمتعت بكل جزء فيها و اكيد التجهيزات حتى لو كانت
شي بسيط تفرق بالبيت وتجدد نفسياتكم سواء كبار او صغار << لاتنسون تطلبون من
كل يشارك بعمل بسيط من صنع ايده
تدويناتي بالاعوام السابقه وفيها أفكار منوعه :
اتركو لي تعليقاتكم تحت متحمسه اشوف ردودكم
القاكم بتدوينات قادمه ~
سلام
حبيبة قلبي اسعدني تعليقك جدا 💛
ردحذفشكرا لك و كل عام وانتي بخير 🌸