منتجات للقضاء على البثور : زيت شجرة الشاي & مستخلص كلينيكال ~ Clinical solution & Tea tree oil

السلام عليكم ورحمة الله وبركاته 

اغلبنا اذا مو كلنا لازم شهريا نعاني من الحبوب المفاجأه اللي سببها هرمونات او دوره او تغذيه سيئه ...الخ 

هالتدوينه مقارنه بين منتجين مخصصين للتخلص من البثور اللي في البشره 

تابعوها معي للنهايه ~

مستخلص كلينيكال سولوشيل

منتج كوري يتحكم بإفرازات الدهون ف البشره , يخفف البقع و يوازن الدهون في البشره ف بالتالي راح يمنع او يخفف من ظهور الحبوب 

 فكرة المنتج سائل و اخر شي باودر , تدخلين عود القطن لنهايته و تبدأين تحطينه ع المكان >> ابدا ما ترجبن العلبه و اذا حصل و طاحت عليك او اختلطو ببعض خليه فتره وبيرجع طبيعي و استخدميه 

له سنه و عليها معاي , وطبعا انتهت مدة استخدامه 

تجربتي معاه بعد اكثر من مره و لاكثر من شخص " مايسوي شي " ابد ابد 

مجرد تحطينه ع البشره و يجف وخلاص مافي مفعول يعطيه 

هل انصح بالمنتج : لا 

مكان الشراء : موقع لينو شوب >> هنا 

زيت شجرة الشاي 

عباره عن زيت شجرة الشاي مُركز , شجرة الشاي معروفه لعلاج مشاكل عديده و من ضمنها المشاكل الجلديه , له كثييييير استخدامات من ضمنها :

* حروق الشمس و لسعات الحشرات 

* تطهير فروة الرأس 

* القضاء على القمل 

* تخفيف بثور البشره 

* يستخدم في بعض طرق التنظيف 

* يستخدم كغسول للفم 

*  واستخدامات كثير اخرى كل وحده لها طريقه معينه  *

استخدمته انا للحبوب اللي تطلع لي فجأه ببشرتي و عالجها لي , فعلا المنتج رااائع اي حبه تطلع لي ع طول بعود قطن اخذ من الزيت و احطه عليها مايمر نص اليوم او اليوم الثاني الا وهي خفت او اختفت تماماً

جدا فادني من ناحية البشره 💚

ايضا ممكن تضيفين قطرات منه لزيوت الشعر او علبة الشامبو عشان يطهر لك فروة شعرك خصوصا اللي فروتها دهنيه او  تعاني من القشره 

القمل : اي وحده جاتها عدوى قمل لاتشيل هم نظفي شعرك منه تماماً و من بيض القمل "الصيبان" و وزعي قطرات منه ع شعرك او حطيه بعلبة بخاخ و اضيفي له مويه و استخدميه بشكل يومي , راح يمنع انتقال العدوى لك , خصوصا امهات الاطفال بالمدارس و المعلمات و اي شخص معرض لهالشي كثير يعانون من هالمشكله ف ممكن يكون حل لكم 

العلبه اللي بالصوره حجمها 10 مل , البعض بيتصغرها بس راح تكفيك لاتشيلين هم ابد و فيه حجم اكبر 

موجود ببودي شوب و اي هيرب 

اخذته من بودي شوب بسعر : 32 ريال 

انصح فيه بالتأكيد 💚💚

وبكذا لكم الحريه تختارون اي منتج يستاهل تقتنونه اذا حابين , اتمنى التدوينه فادتكم 

شاركوني بطرقكم للتخلص من الحبوب بالتعليقات 

اشوفكم بتدوينه قادمه ~ و شكرا