تجهيزي لعيد الاضحى 2018 : تنسيق , عنايه و مكياج و عطر العيد ~ EID 2018

السلام عليكم ورحمة الله وبركاته

يفصلنا عن عيد الحج ايام ، الله يتقبل من حجاجه و يكتب لنا حج مبرور

حبيت اشارككم بهالتدوينه تجهيزي ليلة العيد من لبس و ميك اب....الخ

هالسنه مانزلت اي اوتفت في المدونه لعيد الفطر ف وجب انزل هالتدوينه ، بالمقابل تعليقات جاتني يبون لبس العيد ف الف شكر لكل وحده تثق فيني وتحب ذوقي 😘

العنايه سلسله مستمره ما نربطها بيوم معين او مناسبه معينه ف اسبوعياً انتي سوي لنفسك روتين معين ، قبلها بفتره انا اقشر جسمي بشكل دوري ، حمام مغربي تقريبا شهرياً اسويه ماسكات البشره والشعر بالاسبوع اكثر من مره ... ف وقت المناسبات مايصير استنفار عندي خلاص عادي شاور طبيعي استخدم فيه منتجات ارتاح لها

قبل العيد بيوم او "ليلة العيد" استخدم ماسك لشعري و بشرتي جربت هالماسكين و فادو معي كثير

* استخدمي فرشه او ملعقه للماسك ولاتدخلين يدك عشان مايتلوث او يخرب *

للشعر : ماسك الافوكادو من بوتس، استخدمه بعد الشامبو عشر دقايق يكون بدل البلسم ، لاحظت يرطب شعري و يعطيه حيويه خصوصا طبيعة شعري جاف و كيرلي ف يعطيني كيرلي مرتب اذا استخدمته ، مره حبيته و برجع اشتريه

سعره : 20 ريال و كميته كبيره 

للوجه : ماسك الماتشا من ذا بودي شوب ، ينظف البشره بداية ماتحطينه بتحسين لسعات خفيفه بس تروح بعدها ، البشره الجافه او الحساسه ممكن مايناسبهم ، بشرتي عاديه و التي زون دهني احيانا ف هالماسك ينظف بشرتي ويطهرها & يشيل الدهون ، بعده البشره تكون صافيه نظييفه تحتاج ترطيب طبعا ، لو بشرتي مرهقه او شاحبه و عندي مناسبه ع طول احط هالماسك ، مرتين او ثلاث بالاسبوع 💙

سعره : 100 ريال ويطول معك لانك بكل استخدام بتحتاجين تقريبا ملعقه فقط

شامبو و بلسم الفراوله من بودي شوب : مخصص للشعر الجاف، يعطيه لمعان و حيويه ، فعلا لاحظت اللمعه خفيفه بشعري و ماجففه لي وريحته فراوله بحت

البلسم مع اني بطلت استخدم البلسم لشعري بس استخدمت هذا وحبيته كثير بعد الشامبو يخفف لي نفشة الشعر و يعطيه ترطيب ، احيانا استغني عنه اذا كان عندي ماسك للشعر 

سعر الشامبو و البلسم : 32 ريال للواحد

وقت ما احط قناع الشعر استخدم لجسمي اي شي سواء ماسك او مقشر ف هالمره 

حابه اتكلم عن هالمقشر الرائع من body boom

صار لي شهرين استخدمه من " بودي بوم " وصلني من صيدلية وايتس ، فكرة المقشر اعتقد نفس مقشر فرانك اللي اشتهر من فتره و مقشرات القهوه بشكل عام

استخدمه انا ع بشره نظيفه يعني مافيها شعر مافيها جلد ميت... الخ

مكوناته قهوه و جوز الهند ريحته رايقه ولذيذه زي *الباونتي* ، طريقة الاستخدام مكتوبه عليه , ع بشره جافه تحطينه شوي بتحسين بلسعات بجسمك اعتقد من مكوناته موجوده املاح ، بعدها تبدأين بحركه دائريه تسوين تقشير خفيف للجسم وخلاص تغسلينه جسمك بيكون مترططططب من قلب ، بعض الناس مايحبون احساس الترطيب القوي ف بعده يستخدمون شاور جل ف كل وحده حره من هالناحيه

تعطير الجسم و الشعر ، افضل استخدام المسك " مسك مكه من اجمل " بعدها ابخر شعري وهو مبلول شوي مع مسك او زيت عطري او اي عطر احب ريحته 

لبس العيد ~

اخترت هالجلابيه او الفستان ، مافيها موديل ابد عاديه واسعه اكمام طويله ولها جيب مخفي وطولها حدود رمانة القدم ، المميز فيها الوانها و نقشتها  💗 حتى خامتها جدا رائعه

ولانها عاديه مافيها موديل ع الجسم اضفت ع الخصر شنطه باللون الاصفر غيرت لي شكل اللبس كثير ✨

والصندل او الشبشب اخترته اصفر نفس الشنطه و بما انه بيكون واضح حبيت حركة الكشكش او الرفلز اللي فيه 👍

كل التنسيق من جولي شيك 

الفستان : هنا << اخذته بالتخفيض ب 32 ريال

الشنطه : مخلصه من الموقع 

الشبشب : هنا 

الاكسسوارات ماحبيت اكثر ، اساوري الذهب مع خاتم ذهب وممكن البس ساعه ذهبي بأسود ناعمه وحجمها صغير جدا 

 وطبعا لازم خلخال الرجل 💛

الحلق نفس الشي ذهبي كبير ونازله منه زي الجنهيات … موديله جاي مع الذهب اللي بلبسه وتسريحة شعري

الساعه : هنا , تكلمت عنها بهالتدوينه : هنا

الحلق : هنا 

المناكير حبيت لون محايد وهادي بس يبرز لي شكل اظافري و يحلي اليد والرجل ف وقع الاختيار على هاللون نود طبيعي من زويا ، طبقتين منه تعطيك لون غني وناعم جدا ع اليد

درجة المناكير : cala

شعري قررت اخليه ع طبيعته > كيرلي < ارفعه عشوائي و اربط سكارف عليه مع خصل عشوائيه ع الوجه

مكياجي

* كنسلت الفاونديشن و بالاساس ما استخدمه كثير الا نادرا ، ف بستخدم كونسيلر ال قيرل درجته جايه ع اصفر استخدمه للهالات و اذا كانت عندي بقع خفيفه بالوجه + انظف فيه حواجبي بعد رسمها ، عندي منه درجات ثانيه و كثير احبه تكلمت عنه >> هنا

* الباودر ما استخدم الا برونز و لي فتره طويله استخدم برونز هولا من بنفت درجتها ممتازه وتعطي دفئ للوجه ، من اهم الاشياء اللي ما استغني عنها بمكياجي

* للخدود بستخدم تنت غوغو من بنفت ، لونه مابين الاورنج و الفوشي ، ما احب استخدم التنت بشكل عام ع شفايفي ابد لكن كثير احب شكل خدودي فيه وثباته اكثر من الباودر ، اي تنت ممكن يفي بالغرض كلهم نفس النتيجه مو شرط هذا

* للشفايف بستخدم محدد من واو "وجوه" ، درجته جدا ممتازه وطبيعيه وممكن تستخدمينه بدون روج لكن بما اني بحط روج باهت شوي حبيت احط هالمحدد قبل يغير لي لون الروج شوي

* روج نيود من افون كولكشن مارك ، قوام الروج ممتازه يعطيك احساس المطفي بس ابد ماينشف او يجفف الشفايف تركيبته ممتازه جدا

درجة الروج :dare to be dare

درجة المحدد : woody pink 

سواتش لهم

* اضاءه سائله للوجه من ديفاج ، لمعتها ناعمه ع الوجه و بالنسبه لي صايره احب الاضاءه السائله اكثر من الباودر لانها تعطيني لوك صحي اكثر 

* باليت ايشادو ماكس فاكتور 

 الوانه طبيعيه وفيه كم لون شيمر حبيت الباليت صراحه بستخدم منه لون ع كامل الجفن و اضاءه تحت الحاجب و خط الرمش السفلي بستخدم من الالوان الاخيره دايما احب يكون بني محمر او عودي << هالخطوه ما استغني عنها ابد بمكياجي ، وبالمساء ممكن اكثف الايشادو و استخدم اكثر من لون

* ايلاينر ازرق من مكياجي ، فرشته سهله بالرسم و سلسه و لونه رايق ، فكرت استخدمه في الصباح بما ان مكياجي بيكون هادي جدا ف ممكن اضافة هاللون للميك اب بتكون مميزه خصوصا انه ازرق هادي مو صارخ ابد 
درجته : 501

* داخل العين ممكن استخدم كحل ذهبي من ديفاج ، يعطي شكل حلو للعين خصوصا اني اكثف الماسكرا كثير

* الماسكرا بستخدم دارك ماجيك من ماكس فاكتور مهمتها تكثف لك الرمش وتعطيك نظره دراماتيكيه ههههه ، ع العموم ماتفرق معي لان تكنيكي بإستخدام الماسكرا يضبط مع كل الانواع >> طبقه و استنيها تنشف و ارجعي كرري كل شوي بس لازم تنشف كل طبقه و مشطي رموشك حاولي ابد ماتكون فرشة الماسكرا مليانه منها و حاولي ماتخلين رموشك تتكتل

* للحواجب قلم 3 في 1 من بودي شوب ، عباره عن قلم رسم + باودر + ماسكرا ، بالنسبه لي منتج ممتاز احب اخذ درجه فاتحه لحواجبي ، ارتبها بس بالقلم و ارجع امشطها بالماسكرا بس اذا حسيت الماسكرا فيها لون كثير امسحها شوي قبل بمنديل بعدها امشط حواجبي

* عدساتي من سولوتيكا ، لونها عسلي و حلوه ع العين مناسبه اذا كنتي حاطه ميك اب كثير تعطيك شكل و حتى لو خفيف تعطيك شكل ثاني ، لونها جدا واضح ع العيون خصوصا العين الغامقه ف ما اشوفها مناسبه للاستخدام اليومي او اللي تحب تبين عيونها طبيعيه ، الصباح ما اتوقع البسها بس ممكن ف المساء البسها و اغمق مكياج العيون 👍

عدساتي من هالموقع : eyewa.com

موقع ايوا هو موقع اماراتي متخصص بعدسات الزينه و النظر و النظارات ، اللي يميز هالموقع اسعاره جدا ممتازه و طبعا اصليه المنتجات بالاضافه ان التوصيل مجاني ومايتعدى اسبوع لجميع الدول ، للامانه من المواقع المفضله عندي و اللي انصح فيها 

وجبت لكم كود خصم 15% : fmgirls15

درجة اللون : اوكري ، تلاقونها هنا

و اخيرا عطر العيد 🌸

حبيت استخدم هالمجموعه الصغيره سيلفاتور فيرجامو ، عطر و لوشن من  ferragamo  

 ريحته رايقه كثير و ماهي مزعجه بنفس الوقت مناسبه للعيد ، اللوشن استخدمه اكثر شي ع منطقة الرقبه و الكتف و اليدين قبل ما البس بعدها اذا لبست رشيت العطر ، هالخطوه تخلي العطر فواحنه اكثر

انتهت تدوينتي اتمنى استمتعو  ، و ان شاء الله يكون عيدكم جميل كجمالكم 🎈