من الطبيعة | المر، الكركم , بيكنج باودر و بيكربونات الصودا للعنايه بالاسنان !! تجربتي

السلام عليكم ورحمة الله وبركاته 

سبق وطرحت تدوينه عن رايي في معجون اسنان ديبوريدنت هنا وبآخر التدينه ذكرت اني ماراح ارجع اشتريه مو لانه سيء بس لاني لقيت له  بديل 

تدوينتي اليوم هي عن بدائل طبيعية موجوده ببيوتنا بتساعدنا بتنظيف الفم و الاسنان من التصبغات 

اول الطرق هي البيكنج باودر و بيكنج الصودا ~

موجودين بكل بيت اذا مو كلهم واحد منهم ويدخلون بكثير استخدامات غير الطبخ زي تنظيف الاسنان و البشره ...الخ 

جربتهم اثنينهم ونفس النتيجه تقريبا 

بعد ما افرش اسناني بالمعجون بللت فرشة الاسنان واخذت شوي من المسحوق عليها وبدات افرش بطريقه ناعمه 

هالحركه بالاسبوع مرتين اسويها ولاحظت انتعاش ونظافه بالاسنان >> ممكن اللي اسنانهم شديدة الصفار يلاحظون تغيير بسيط باللون

اللي اسنانها حساسه ممكن مره بالاسبوع كفايه 

ثاني شي اللي هي الزيوت الطبيعيه ( زيت الزيتون - زيت السمسم )

موجوده هالطريقه عند جداتنا من بعد الفحم بالفتره السابقه ظهرت كثير و انتشرت بتقنية سحب السموم بالزيت مو بس للاسنان للثه ولمشاكل كثير بالجسم وتقدرون تبحثون عنها & شفت اكثر من حساب يتكلم عنها بشكل مفصل 

استخدامي للزيوت كان لغرض تفتيح الاسنان هل هي حقيقه ام خرافه !!

بدات بهالطريقه من رمضان العام >> والحين دارت السنه وتو اتكلم عنها ههههه

استمريت بشكل منتظم طوال الشهر من بعد السحور مقدار ملعقه او ملعقتين  ربع ساعه مضمضه بزيت السمسم من المعصره او زيت الزيتون وبعدها اكمل طبيعي تفريش الاسنان والغسول .. احيانا قبل التفريش و احيانا بعد اسويها

هل فتحت اسناني لاحظت تفتيح جدا جدا بسيط & لمعه بأسناني خصوصا بزيت السمسم & بالنسبه للثه وهالامور ماعندي مشاكل ف مالاحظت شي 

برضو هالطريقه كثير شافو نتائج مبهره عني انا هاذي تجربتي وملاحظتي 

هل ممكن اعيدها ايه ممكن بين كل فتره اكرر التجربه 

اخر الطرق الكركم ~

وهو احدث الاشياء اللي جربتها للاسنان 
الطريقه جدا بسيطه تاخذين كركم استخدمت انا كركم الاكل ملعقه منه مع شوي مويه لحد مايصير قوامه شوي ثقيله بعدها لمدة دقيقتين تمضمضت فيه وقبل اغسل فمي اخذت الفرشه وفرشت فيها باقي الكركم الموجود بالفم وفرشت اسناني بالمعجون وانتهينا 

هالطريقه زينه وشينه ليش ! اولا اول ماشربت الكركم جاني غثيان مو طبيعي بس تحملت , الشي ثاني حسيت بلسعات حاره بفمي ولثتي , والشي الثالث ممكن اللون يمسك ببعض الاسنان ف تحتاجين تجيبين قطعه مبلله بزيت وتمسحين السن الى ان يروح اللون ,
واخيرا فرشتك بيقلب لونها اصفر خخخخ

الحسنه الوحيده بهالتجربه حسيت بنظافه بأسناني ولثتي 
وطبعا ما انصح احد يسويها اذا عندك مناسبه او اسنانك تمسك اللون لان لها بدائل فوق 

مضمضه طبيعيه للفم 🌿

مكوناتها طبيعيه وموجوده بأغلب البيوت وتناسب كل الناس ماعدا اللي يتناولون ادويه المر ماينفع لهم لانه يعتبر مضاد ف ضروري تستشيرون اطبائكم

هالمضمضه مفيده جدا جدا للأسنان و اللثه و فطريات الفم و حالات التسوس، المر هو اهم مكون فيها مضاد للبكتيريا ومطهر للفم و مقوي للثه ويساعد ببعض حالات تقرحات الفم و طبعا رائحة الفم

تستخدم يوميا مضمضه لمدة عشر دقائق 🍃

مكوناتها بالنظر او ملعقه صغيره لكل مكون :

مُر
قرنفل
ملح
٤ نقاط زيت شجرة الشاي + زيت الليمون
ماء حار
تحطينهم بعلبه زجاجيه معقمه و تخلينهم الى ان يذوب المر والملح وتستخدمينها، انا اخليها يوم كامل و استخدمها

ممكن تضيفين زيت النعناع او خل طبيعي او حبه هيل حسب رغبتك كل المكونات تقدرين تستبدلينها او ماتستخدمينهت بس اهم شي المر و الملح هم المكونين الرئيسيين 👌

لو احد منكم جرب شي منهم او تجارب جدبده اكتبو لي تجاربكم تحت 

سلام