رحلتي الى ثول ~♥

السلام عليكم ورحمة الله وبركاته 

وحشتووني ♥ .. كيفكم بعد الاجازه 

تدوينة اليوم مختلفه شوي بس حبيت انزلها كتوثيق لهاليوم و كتغيير في مواضيع البلوق ♥♥

لو انتي من النوع الملول وماتحبين هالتدوينات لاتكملين لان ماراح تستفيدين شي

راح اعرفكم اليوم على مدينه مره جميله قريب من جده ويمكن اغلبكم تعرفونها 

مدينة ( ثول ) ♥

على طريق المدينه المنوره تبعد عن جده حوالي 80 ك = ساعه \ ساعه الا ربع 

مدينه صغيره هاديه ونظيفه جدا 

مافيها شي مميز الا بحرها وسمكها <3

ما اعرف ذكرتني بينبع بس طبعا ثول احلى 

مو اول مره ولا ثاني  ولا ثالث مره نروح لها و بما ان طلعتنا هالمره مخطط لها تكون من الصباح للمسا >> تقريبا يوم كامل ف حبيت اصور لكم صور مخصوص للتدوينه 

زي ما قلت اللي يحب البحر والسباحه راح يروق له بحر ثول مناطق منه عميق ومناطق لا

شواطئها وبحرها ابدا مو زي جده لان للامانه جده من شمالها لجنوبها بحرها وصخ للاسف 

اللي حاب يروح لها انسب وقت الصباح يكون البحر هادي ونظيف ومافيه ناس كثير 

فيها مساجد وحمامات ومطاعم وكلها متقاربه جنب بعض 

كل شي نظيف ومرتب بس من بعد الساعه 3 الظهر يتحول المكان لمزبله وانتو بكرامه 

حمامات المسجد من بعد العشا تقفل ولو دخلتيها قبل بتنصدمين من الناس اللي ماخذين راحتهم بقوه هم واطفالهم ويتروشون 

ع العموم اللي حبتها وتفكر تروح لها زي ما قلت من الصباح وتاخذين كل احتياطاتك خصوصا لو معك اطفال

البحر فيه امن وحراسه شديده >> مره حبيت هالشي ♥

مقتطفات من كشتتنا 

قلعتي المصونه :$

وهالشي دخلناه البحر وطلع ممنوع للاسف 

 و اهم من المهم الشاحن حبيب القلب ♥

و من قبل المغرب بشوي خلاص يبدأون يطلعون الكل وممنوع السباحه 

ويبدأ يظلم المكان 

لمينا عفشنا وانتقلنا لساحة المسجد 

و من الذ الاسماك اللي ذقتها هناك طاازه من البحر ومافيه نكهات مدري كيف ولا كله بهارات ♥

في جهه ثانيه مره جميله ماصورتها للاسف اللي هي جهة المطعم و تطل ع البحر ساحه نظيفه مافيها تراب ولاشي وتقدرين تستأجرين جلسه يفرشونها لك 



وبكذا خلصت تدوينة اليوم اتمنى عجبتكم ولو حابين انزل تدوينات من هالنوع اكتبو لي بالتعليقات او تواصلو معاي بأيقونات البرامج فوق يمين الشاشه 

وشكرا ~ ♥