السلام عليكم ورحمة الله وبركاته
عودة للمدونة والتدوين بموضوع شيق لي قرابة السنة وانا حابه اكتب عنه
( الربح من الإستبيانات )
هو يعتبر من ضمن نطاق " العمل عن بعد " , مافي شروط لا جنس معين ولا جنسية ولا مؤهلات ولا هويه , المطلوب فقط مبدئياً جهاز جوال او لاب توب و بريد ايميل عشان تسجل فيه بأحد او كل المواقع اللي بتكلم عنها بهالتدوينة
من بحثي عن هالمجال بالبدايات لاحظت المحتوى العربي فيه جدا قليل والتجارب الحقيقة عدد اصابع اليد , حبيت اطرحه هنا قد يكون فاتحة رزق لأحد , خصوصا الطلاب او اي شخص بلا عمل ويبي يتمسك بمصدر رزق
كلها مواقع تجاربي معها حقيقة و فعلا شغاله عليها واكسب منها دخل الى الان , حتى لو كان دخل بسيط ✌
جربت كثير مواقع اغلبها كانت تستهدف فئات بالدول الاجنبية فقط ف لو مهتمين تقدرون تبحثون عنها وتلاقون كثير كثير مواقع وتطبيقات ومراجعات حقيقة لناس شغالين فيها والمبالغ جيده اللي يكسبونها
لكن كتجربتي انا ثبت على 5 مواقع تقريبا تشتغل بالبلد اللي انا فيه وغالبا بالشرق الاوسط كله، اغلبها لها تطبيقات ممكن تنزلونها لكن انا ادخلها من قوقل
اول موقع وهو الأساس ( Ysense )
موقع اجنبي , يوفر عدة استبيانات بأسعار تبدأ 7 سنت وممكن توصل 7 دولار للاستبيان الواحد , وعندهم صفحة ثانيه تقدرون تكسبون من خلاها توفر تطبيقات تحملونها وتكسبون اسعار جيده منها
لكن بتكلم عن تجربتي انا بالاستبيانات , تعتبر مسح من الشركات التسويقيه بعدة لغات ومتوفره العربية الموقع يوفر استبيانات بعدة مجالات ممكن الاغذيه او الاعلانات او الديكور او بعض المواقع او طرح منتج جديد ويبون رأيك فيه
غالبا ياخذون معلومات بسيطه عنك واذا كنتي الفئة المستهدفة تكملين الاستبيان , اذا لا يطلعك من الاستبيان *وصارت لي كثييير بشكل يقهر😆*
بعض الاسئلة تجيك فحص للجودة انك مو روبوت او ماتسلكين لهم يبون اجابات صحيحة وصادقة , لو في تناقض او تلاعب بالمعلومات وتكرر هالشي حسابك بيجي عليه بلوك بحيث ماتنزل لك اي استبيانات
ع العموم نبدأ بخطوات التسجيل بالايميل وبتوصلك رسالة تأكيد على الايميل , بعدها الصفحه الرئيسية وهنا فيها شرح سريع
وهكذا تجمعين رصيد ونجي لطريقة السحب , كيف نسحب ارباحنا
انا شخصيا عن طريق الباي بال اسحبها , كل عشرة دولار اسوي لها سحب وادخل حسابي في الباي بال وتوصلني خلال اسبوع
خلال سنه اقدر اقولكم ربحت منه مايقارب 300 دولار بمعدل عشرة دولار اسبوعيا تقريبا , وعلى حسب جهدي اوقات ما ادخل الموقع ف تقل النسبة و اوقات مايكون في استبيانات مناسبة
وبشكل سريع بشرح اهم النقاط لفتح حساب باي بال وتقدرون تشوفون مقاطع مفصله اكثر لأي مشكله ممكن تواجهكم معاه
*التسجيل عن طريق الايميل وممكن تضيفين اكثر من ايميل بالحساب حقك , عن طريق الايميل تستقبلين الحوالات
*بالنسبة لإسمك احرصي يكون مطابق للإسم اللي في بطاقتك , لان صعب انك تغيرينه بعدين يعطيك محاولة وحده فقط
*الخطوة الثانية تربطين الفيزا او المساتركارد اللي بتحولين ارباحك لها , تضيفينها بالباي بال لكن بعض المواقع عشان يتوثق حسابك يطلبون حساب بنك امريكي , خطوة بسيطة بتفتحين حساب بموقع البايونير
( هنا ) وتربطين بطاقتك فيه وبيعطيك حساب بنكي امريكي حقيقي
*بعدها تضيفين حسابك الامريكي بالباي بال وبكذا توثق حسابك
ممكن تواجهك مشكلة بأحد المواقع اذا جيتي تحولين ارباحك قد يكون بسبب الاسم غير مطابق وهذا بسيط روحي للموقع وغيري اسمك لنفس اللي بالباي بال
..... نرجع لمواقعنا .....
ثاني موقع وهو موقع عربي للاستبيانات فقط ( Ipsosisay)
مايعطينا مبالغ بس تجمعين نقاط وتستبدلينها ببطاقات شحن او قسائم من نون او وجوه او لولو هايبر , تتحدث القائمة كل فترة
الموقع جدا بسيط ومايطلب منك الا ايميل فقط
بالنسة للجوائز اذا استبدلتيها يرسلها لك على البريد
الموقع الثالث ( Metroopinion )
موقع عربي يعطيك استبيانات بأسعار مختلفه بعد ماتجمعينها تروحين للمكافئات ممكن تستبدلينها بقسيمة امازون او من موقع Gcode مليان قسائم للمواقع وبطاقات شحن , يوصلك رمز التفعيل خلال اسبوع على الايميل وتدخلين ع الموقع تفعلينها وتشترين منها اي قسيمة
الموقع الرابع (Mobrog )
موقع عربي , يعطي استبيانات بمبالغ حلوه تقدرون تحولونها باي بال اذا وصلت 6 دولار , لكن عني انا ما استفدت منه الا مرتين اعتقد لان بعض الاستبيانات تروح علي او تحتاج جهاز كمبيوتر بس ع العموم هو موقع حقيقي و أرباحه حقيقية
الموقع الخامس ( Youropinion )
موقع استرالي يعطي استبيانات بمقابل مالي , واسعارها تكون حلوه لكن المشكله قليلة يعني ممكن يمر اسبوع او اكثر ماينزل استبيان
بعد ماتجمع 20 دولار يتحول على الباي بال , لكن تتحول بالدولار الاسترالي يعني بتوصل في الباي بال بهذه العمله و حلها جدا بسيط من نفس الباي بال تختارين تحويلها للدولار الامريكي وتتحول على طول تقريبا تعادل 12 دولار امريكي
*
*
*
بكذا انا وصلت لنهاية تدوينتي , من كل قلبي تمنى تكون فاتحة رزق على كل من قرأها
و اتمنى تشاركونها مع اي شخص ممكن تفيده هالتدوينة
اكيد انتظر تعليقاتكم و مشاركاتكم بكل حب لو لكم خبره بهالمجال او ترشحون لنا تطبيقات او مواقع ممكن الواحد يترزق منها
اللهم إرزق مني و ارزقني 🌿
سلام 🕊️
ليست هناك تعليقات:
إرسال تعليق