سنة مباركة عليكم يا أصدقاء 💛
بدايات... حبيت اكتب هالتدوينة بدون اي تخطيط عميق مجرد رؤوس افكار 👀
حبيتها تكون اعمق من مجرد شكليات، اي شي فيها بيكون وراه قصه من العام الماضي "حرفياً" كل شي لدرجة تفاصيل الصور وديكورها كل قطعه فيه مرتبطه بموقف او لحظه 🙇🏼
النصف الاول من السنه صار لي حدث شخصي جدا مهم , صادف العيد وكانت مشاعر لطيفه فيه 💛
اواخر شهور السنه الميلاديه نشاطي قل في حساباتي، يمكن لان مر علي شهر او شهرين انشغلت فيهم بالبيت وتجهيزات زواج اختي، هالجري في الحياه ابعدني شوي عن السوشال ميديا "كناشطة" صرت متصفحة بشكل كبير، ومستهلكة للخدمات والحسابات بشكل اكبر الحمدللّٰه، فعلاً هالتطور نعمه عظيمه جداً بأبسط الأشياء استشعرته، قد ايش مشوار اميال اختصر بضغطة زر 🤷
عدت بشكل تدريجي ولازلت ساحبة، روتيني مقلوب، حسيت ماعندي محتوى قوي يليق بالشي اللي أقدمه، يمكن الفتره كانت انطفاء الشغف بس حبيت اعيشها، مو لازم اكون دايما منجزه، عقلي شغال افكار بس ماعندي دافع اسويها يمكن كسل و اعذار سخيفه لكن "اتز اوكي" يا نفسي خذي راحتك، كتاب ما اكمله، شغل موقفه نصه، مهام تتأجل بالاسابيع....
ما أخفيكم كنت منشغله بشي ثاني، تجربة جديدة و مصدر دخل شبه فوري 😎 قاعده اجرب هالمجال وضروري اكتب عنه تدوينة و اشاركه بكل مكان لأن متأكده بيكون فاتحة خير ع كثير
لما افكر بشكل اعمق شوي الاقي الا في اشياء رهيبه انضافت لي، صرت لاشعورياً اقرأ بأشياء جديده علي حتى لو ماتهمني ، اتسائل عن أشياء كثير و ابحث عنها، اشوف نفسي مرنه بس بهالاوقات بالذات مرونتي صايره فضيعه 🤔 حسيت حلو هالشي
بوسط هالمعمعه لقيت نفسي لاشعورياً اجهز للسنه الجديده 2022 🎈
دورت بلانر وهذا كان اكثر شي شاغل بالي، ما اتخيل نفسي بدون بلانر، اخذت وقت طويل ادور كنت ابي شي مناسب لذوقي و ميزانيتي المحدودة ماحبيت اصرفها كلها عليه، لقيت حسابات رهيبه ومواقع ارهب وأشياء من جمالها تخليني مبسوطه مادري ليش 😍 لاحظت اني احب اشوف كل شي حلو حتى لو ماكان لي، مجرد اعرف ان هالشي بالحياه اصير مبسوطه 🙊
ع العموم اخر شي استقريت على هالبلانر من Typo، طلبته من نمشي سعره كان اقل من ٥٠ ريال ، غير مؤرخ تصميمه حلو وبسيط مافيه زحمة تفاصيل فقط اول اربع خمس صفحات فيها توقعات الابراج وصفحه للارقام المهمه و بعض التحديا , حجمه A5 هو اللي كنت ادور عليه، الكفر حقه مو كثير ذوقي بس تخطيطه الداخلي يشفع له صراحه
تلاقونه : هنا
قبلها بوقت محفظتي "الكارد هولدر" خربت، اطرافها طلع الصمغ حقها وصارت تلصق ببطايقي وفلوسي برغم اني احبها و كانت جديده واستعمالها بسيط
قررت اني استاهل وحده غيرها بما اني صرت ابني ثروتي 😂 وخليتها هدية ميلادي السابع والعشرين 👏🏼
بنفس المدة صرفيتي كثرت و" تباركت" ولله الحمد، اذكر اخذت اغراض بسيطه للمطبخ، اكثر شي كنت حابته قطاعة السلطة و جهاز الوافل 😋
ع العموم الجهاز رهيب وكل اللي بالبيت صايرين يستخدمونه بشكل شبه يومي، احلى شي اني اخذته بسعر واو اذكر دفعت بس ٢٠ ريال وكان عندي رصيد بالموقع مايتجاوز ٥٠ ريال 😁 الجهاز بالتخفيض مابين ٥٠ الى ٨٠ ريال، صفقة رابحه بالنسبه لي 💛
هذا رابطه : هنا
وعشان كذا هالسنه كيكة ميلادي وافل بجهازي البطل 🎂 و ما اخفيكم ان الصحن اهديته لنفسي لاني اغرمت فيه وقررت استخدمه بأول مناسبه حلوه 💁
اخذت بعد قطعة ملابس و اقدر اقول اخترتها بحب ♥️ وقررت اخليه تنسيق الميلاد بلوني المفضل الابيض
صورة ميلاد هالسنه اللي كل شي فيها وراه قصة 🖤
شكرا لكل عين وصلت لهالسطر
اتمنى لكم اوقات مباركة 🎈 القاكم بتدوينة قادمة
سلام 🕊️
ليست هناك تعليقات:
إرسال تعليق