التكنولوجيا وصلت لعالم البيوتي و الجمال والعناية 🌸 جهاز UFO من فوريو
فوريو هي شركه سويديه متخصصه بأجهزة العنايه بالبشره للجنسين، اجهزتهم مصنوعه من السيلكون الطبي عالي الجوده و هذا اكثر شي صرت احب اقتنيه لان صعب البكتيريا تنمو عليه وسهل جدا تنظيفه
من اشهر اجهزتها اجهزة التنظيف لونا بإصداراته 💛 شخصيا جربت لونا ميني وخلصت اهتزازاته لانه عباره عن ١٠٠ اهتزاز وكان جدا جدا رائع 👌 و افكر اخذ جهاز ثاني بإعادة الشحن
جهاز اليوم هو أول ماسك ذكي بالعالم بفكرته، عباره عن جهاز سيلكون بحلقه شفافه تثبت الماسك الورقي، الجهاز يشتغل عن طريق تحميل التطبيق من ابل ستور او قوقل بلاي اسمه Foreo
واقترانه بالتطبيق ع الجوال تشغلين البلوتوث وتحددين جهازك ويبدأيتعرف عليه التطبيق
جدا سهل ويعطيك تعليمات اكثر ومعلومات عن الجهاز ويتعرف على الماسك عن طريق مسح الباركود , بعدها يصدر صوت موسيقى يساعد على الاسترخاء وقت تشغيل الجهاز يصدر اهتزازات وانتي تمررينه ع وجهك
تقنية الضوء العلاجي LED بالاشعه الفوق بنفسجيه بثلاث موجات
اكثر ميزه بالجهاز هي التبريد و الحراره، عشان تسمح بمكونات الماسك بالتفاعل مع البشره من خلال فتح المسام بحرارة الجهاز و التبريد اللي يعطي استرخاء ويقفل المسام ويساعد على تقليل الانتفاخات
بالنسبه للماسكات منوعه تشتريها منفصلة تقريبا كل باكيج فيه ٧ ماسكات مخصصه بالجهاز و مصنوعه بتقنيات كوريه
كل ماسك مكوناته غير شي بالكولاجين و شي للنهار و شي لليل وحاليا اصدرو ماسكات بمكونات طبيعيه
لكن من بعد ماجربتهم كلهم , كلهم يعطوني نفس النتيجه ترطييييب
الماسك كميته كبيره داخل المغلف ف استخدمه على رقبتي ويديني
الشحن بمدخل USB , وزن الجهاز خفيف وصغير ممكن تاخذينه معك اي مكان معاه ستاند اكريليك صغير عشان تسندين الجهاز عليه
ضمان الجهاز عشر سنوات ضد العيوب المصنعيه
شخصياً اشوفه حلو بأوقات السفر يختصر عليك وقت العنايه ببشرتك بدقيقه بس وتنتهين & قبل المكياج بشكل سريع تستخدمين الماسك عشان تجهزين بشرتك & قبل النوم لان الماسك مايحتاج تغسلينه احب استخدمه قبل النوم اصحى وبشرتي مترطبه ورويانه ✨
رأيي النهائي عنه :
بعد استخدام ٤ شهور لي ولاخواتي
شحنه طويل من وصلني للان ماشحنته، صرت استخدمه بدون اقتران بالتطبيق فقط اركب الماسك و اعلق خمس ثواني ع الزر الجانبي ويبدأ يشتغل، ف هالنقطه اقترانه بالتطبيق والنت ماعجبتني لاني ابي شي سريع 🙇
الجهاز مايعتبر علاجي اعتبره شي ترفيهي و جداً بمجال العنايه و اشوفه مُكلف سعره 1100 ريال و سعر الاقنعه يتراوح من 70 الى 130 ريال لسبع او تسع اقنعه استخدام واحد ! ابدا مو شي اقتصادي و نتيجته ماتتجاوز الترطيب والمساج للبشره لا اكثر
ما اعرف لو ممكن استخدم اقنعه خارجيه او استخدم الجهاز على البشره بدون قناع مثلا ع سيروم ! 🤷
اللي حابه تقرأ اكثر عنه او تشتري الجهاز تحصلونه بموقعهم : Foreo UFO
وتلاقونه بسيفورا ونمشي و اسوس 🍃
هذا كل شي لليوم لو جربتو الجهاز او عندكم اي انطباع عنه او توقعات تقدرون تشاركوني بالتعليقات
سلام 🕊️
ليست هناك تعليقات:
إرسال تعليق