رمضان 2020 غير | Ramadan Kareem

السلام عليكم ورحمة الله وبركاته

حال الحول و دارت السنه وجا احلى شهر فيها رمضان 🌙

هالسنه مختلفه على كل العالم رمضان ٢٠٢٠ بيكون مميز عن السنوات السابقة والقادمة

الحمدلله ربي بلغنا فيه واحنا بأفضل حال، البعض متشائم من الأوضاع الحاليه مع أزمة كورونا وماجهزو شي وعايشين برعب وحزن... الخ

فيديو هالسنه 🎬

عني انا سويت تجهيزات نفس كل سنه ، البيت كله يمارس طقوس كل سنه ويستعد الحمدلله مع بعض القيود من برا لكن مو مشكله متأكده بتعدي هالايام

أجواء رمضان سابقته 💛 احب اشوف التجهيزات احب كل شي يخص هالشهر عشان كذا احرص انه يكون له جو خاص و احسس اللي حولي بهالشي، خصوصا الأطفال مهم مهم مهم يحسون انه لرمضان طابع خاص ✨

تجهيزات هالسنه كلها عندي من اول، كنت ناويه ع ثيم محدد بس كورونا خرب علي و غيرت الخطه وجمعت اللي عندي بالبيت ونسقتهم سوا

Diy

بما ان المساجد مقفله سوينا مسجدنا بالبيت 😎 

 كل سنه نصلي التراويح بالمسجد ف هالسنه بإذن الله بنصليها سوا بالبيت ف رتبت ركن بسيط للصلاه بغرفه فاضيه عندي

رسمت المخطط و كل الأغراض اللي بستخدمها، استخدمت الشريط اللاصق الاسود ( الشطرطون )

 واجهت صعوبه بالمنحنيات ماتضبط به ف ممكن تستبدلونها بزوايا بتكون ارتب و أسهل لكم، أو ممكن تستبدلونها بقصاصات 

انا ركبت بالرسم حق الباب من فوق الهلال اللي سويته العام

 علقت عليهم اضاءة على شكل هلال

حطيت اضاءة وسله للسجادات

سله ثانيه فيه المصاحف و السبحات وبعض كُتيبات الأذكار و معاني أسماء الله

فوقهم ركبت جدول لمواقيت الصلاه ✨

*

*

سفرة الطعام 🍽️

المميز برمضان ان الكل يجتمع بوقت واحد و على سفره وحده ، احتياجنا للأطباق يزيد لأن وجبات رمضان تختلف عن باقي الايام

نسقت طقم سفره ورتبت الأطباق، أكثر شي ساعدني انهم كلهم باللون الأبيض ف كان سهل تناسقهم سوا

وطبعا مع بعض الشموع والنباتات

أضفت كروت كتبت فيها دعاء الإفطار 

 حلو تكون موزعه ع السفره بحيث محد ينسى و الأطفال يتعودون عليها بدون تلقين

تهنئة رمضان ✨

سويت أفكار لهدايا هالشهر، تهدينها اهلك أو جيرانك وكلها بسيطه من البيت بما ان مانقدر نطلع نشتري أشياء

اول تهنئه فازه شفافه وحطيت فيها قطع شابوره حاليه

 زينتها بورق صناعي وحطيت جمل صغير طرف الفازه 🐪

*
*

ثاني فكره ممكن سجاده أو مصحف أو صندوق فيه معمول

 غلفته بقماش مورد وزينته من برا بورد و حطيت مسبحه مع كرت

و اخيرا لاتنسون الجانب المعنوي و الروحاني، صح نهتم مادياً ببيوتنا و ملابسنا بس لاننسى نضيف عادات جديده حلوه بيومنا طوال هالشهر، نكثف ثقافتنا الدينيه

من الاشياء اللي ناويه استمر عليها هي الامتنان، كل يوم اكتب كم نعمه ممتنه عليها طبعا ماراح احصيها {وَإِن تَعُدُّوا نِعْمَةَ اللَّهِ لَا تُحْصُوهَا ۗ } بس عشان احس بالنعمة اللي انا فيها دائما نركز ع ايش ناقصنا و مانشوف ايش النعم اللي غرقانين فيها ✨ ومتأكده الامتنان بيفتح علي باب من الوفره و الرضا { لَئِن شَكَرْتُمْ لَأَزِيدَنَّكُمْ ۖ }

التخفف من الجوال ، مقرره هالشهر اخفف استخدامي للنت و ابدأ احرر وقتي منه، بالمقابل جزء من استخدامي له بيكون بتفسير كلمه او آيه من القرآن، هالشي بيساعدني اني اركز بقرائتي له و أحاول افهم الآيات و ابحث عن سبب نزول ايه او قصتها 💛

دائمآ تذكرو رمضان هو نفسه رمضان مهما اختلفت ظروف الدنيا و أحوالها رمضان كريم مايتغير، الخيار لنا والتغيير بيدنا نقرر كيف نستقبله هل بيكون زيه زي باقي الشهور أو نكرمه وبيكون خير الشهور 🌛

{ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ }

اللهم أعنا على صيامه و قيامه و بلغنا تمامه ، الحمدلله

سلام